Nov 12, 2012

ഗണിതജ്ഞന്‍റെ കണക്ക് തെറ്റുമ്പോള്‍...

പതിനായിരക്കണക്കിന് ലൈക്കുകളുമായി ഫേയിസ്ബുക്കില്‍ കറങ്ങുന്ന ഒരു വീഡിയോ ലിങ്ക് ആണിത്. മുന്നില്‍ ഇരിക്കുന്നവരുടെ അജ്ഞത മുതലെടുത്ത് കല്ലുവെച്ച നുണ അടിച്ചു വിട്ടു ചില രഹസ്യ അജണ്ട നടപ്പാക്കാന്‍ ശ്രമിക്കുന്ന ഇയാള്‍ ഇന്ന് ഇന്ത്യയിലെ തന്നെ വലിയ പ്രശസ്തിയും ആള്‍ബലവും ഉള്ള ഒരു വാഴ്ത്തപ്പെട്ടവന്‍ ആണ്. (അതുതന്നെയാകണം അജണ്ടയിലെ മുഖ്യ ഇനം, പ്രശസ്തി). രണ്ട് കാര്യങ്ങളാണ് അയാളുടെ പ്രധാന പിടിവള്ളികള്‍- ഒന്ന് അയാള്‍ പറയുന്ന കാര്യങ്ങള്‍ കേള്‍ക്കുന്നവര്‍ക്ക് തീരെ അറിയില്ല. രണ്ട്, സ്വന്തം രാജ്യത്തോട് ജനങ്ങള്‍ക്കുള്ള വൈകാരിക അടുപ്പം. നമ്മുടേത് വലിയ മഹത്തായ പാരമ്പര്യമാണെന്ന് കേള്‍ക്കുമ്പോള്‍ തോന്നുന്ന അഭിമാനം കാരണം അയാള്‍ പറയുന്ന കാര്യങ്ങളില്‍ സംശയം തോന്നില്ല. ഇപ്പറഞ്ഞ കാര്യം പ്രശസ്തിയുടെ ആദ്യഘട്ടത്തില്‍ മാത്രം മതിയാകും. പ്രശസ്തനായിക്കഴിഞ്ഞാല്‍ പിന്നെ ഒരാള്‍ പറയുന്നതില്‍ ജനങ്ങള്‍ക്ക് തീരെ സംശയം തോന്നില്ല.
അടിസ്ഥാനരഹിതമായി ഇയാള്‍ ഉന്നയിക്കുന്ന അവകാശവാദങ്ങളുടെ ഒരു വിശകലനമാണ് ഇവിടെ ഉദേശിക്കുന്നത്. ദാ തുടങ്ങുന്നു

സത്യം 1: 'ഫൂമി' ഉരുണ്ടതാണെന്ന് 10000 വര്‍ഷങ്ങള്‍ക്ക് മുന്പ് നമ്മള്‍ 'ഫാരതീയര്‍ക്ക്' അറിയാമായിരുന്നു. കാരണം വിഷ്ണുവിന്റെ വരാഹാവതാരം ഭൂമിയെ വെള്ളത്തില്‍ നിന്നും പൊക്കിയെടുക്കുന്ന ചിത്രത്തില്‍ ഭൂമി ഉരുണ്ടതായാണ് കാണപ്പെടുന്നത്.

അല്ല ഒരു സംശയം, ഈ ഹിന്ദുക്കള്‍ക്ക് പഴയകാലം എന്ന് പറഞ്ഞാല്‍ 10000 വര്‍ഷത്തില്‍ കുറഞ്ഞ കണക്കൊന്നും ഇല്ലേ? ഇന്നാള് വേറൊരു മഹാനും പറയുന്ന കേട്ടു 10000 വര്ഷം മുന്‍പത്തെ കാര്യം. ഈ വരാഹാവതാരത്തെക്കുറിച്ചുള്ള ഏറ്റവും പഴയ സൂചന പോലും ക്രിസ്തുവിന് വെറും 500 വര്ഷം മാത്രം മുന്പ് എഴുതപ്പെട്ട ഛാന്ദോക്യോപനിഷത്തില്‍ ആണ്. അതായത് എങ്ങനെ കൂട്ടിയാലും 2500 വര്‍ഷത്തിന് മുകളില്‍ അത് പോവില്ല! വരാഹപുരാണം ഉള്‍പ്പടെയുള്ള പുരാണങ്ങള്‍ മിക്കതും എഴുതപ്പെട്ടത് ക്രിസ്തുവര്‍ഷം 3-5 നൂറ്റാണ്ടുകളില്‍ ഗുപ്ത കാലഘട്ടത്തില്‍ ആണ്. (ക്രിസ്ത്യാനികളെ സംബന്ധിച്ച് ആണെങ്കില്‍ ഭൂമി ഉണ്ടായിട്ട് തന്നെ വെറും 6000 വര്‍ഷമേ ആയിട്ടുള്ളൂ. അപ്പോഴാണ് ഹിന്ദുക്കള്‍ 10000 വര്‍ഷം മുന്പ് എഴുതിയ പൊത്തകത്തിന്റെ കണക്ക് പറയുന്നത്). മറ്റൊന്നുള്ളത് വരാഹപുരാണത്തില്‍ ഭൂമി എന്ന് സൂചിപ്പിക്കുന്നതല്ലാതെ അത് പരന്നത് എന്നോ ഉരുണ്ടത് എന്നോ പറയുന്നില്ല. ഇവിടെ സാര്‍ ചൂണ്ടിക്കാണിക്കുന്ന ചിത്രങ്ങള്‍ വളരെ അടുത്ത കാലത്ത് വരയ്ക്കപ്പെട്ടതാണ്. വികിപീഡിയയില്‍ കാണുന്ന 1923 ല്‍ വരയ്ക്കപ്പെട്ട വരാഹാവതാര ചിത്രത്തില്‍ ഭൂമിയ്ക്ക് ഒരു മലയുടെ രൂപം ആണെന്നത് കൂടി ശ്രധിക്കുമ്പോള്‍ സാറിന്റെ ഉദ്ദേശം വ്യക്തമാവും. ഇതൊക്കെ പോട്ടെ, ഈ പറയുന്ന സംഗതി ഒക്കെ സത്യമാണെന്ന് സമ്മതിച്ചാല്‍ തന്നെ ഭൂമിയെ ഏതോ കടലില്‍ നിന്നും പൊക്കിയെടുത്തു എന്ന് പറയുന്ന ഭൂലോക വിഡ്ഢിത്തത്തെ കുറിച്ച് സാറിന് ഒന്നും പറയാനില്ല. ഭൂമിയെ മുക്കാന്‍ പോന്ന ആ കടല്‍ എവിടെയാണാവോ?
കഴിഞ്ഞില്ല, ഫാരതത്തിലെ പഴയ പുലികളുടെ മഹത്വം കാണിക്കാന്‍ സാര്‍ യൂറോപ്യന്‍മാര്‍ക്കിട്ട് ഒരു താങ്ങും കൊടുക്കുന്നുണ്ട്. അപ്പോളോ മിഷന്‍ (1970's) എടുത്ത ഭൂമിയുടെ ചിത്രം കാണുന്നതുവരെ ഭൂമി ഉരുണ്ടതാണെന്ന് യൂറോപ്യന്‍മാര്‍ക്ക് അറിയില്ലായിരുന്നു എന്ന്. തള്ളുമ്പോള്‍ ആഞ്ഞു തള്ളണമല്ലോ അല്ലേ? പണ്ട് പതിനഞ്ചാം നൂറ്റാണ്ടില്‍ മഗല്ലന്‍ കപ്പലില്‍ യാത്ര പോയ കഥ സ്കൂള്‍ മുതല്‍ പഠിക്കുന്ന ചേട്ടന്‍മാര്‍ ആണ് മുന്‍പില്‍ ഇരുന്ന്‍ ഈ സാറിന് കൈയടിക്കുന്നത് എന്നോര്‍ക്കണം.

സത്യം 2: തിളക്കത്തില്‍ 15-ആം സ്ഥാനത്ത് നില്‍ക്കുന്ന അന്‍റാറസ് നക്ഷത്രത്തെ ജ്യേഷ്ഠ എന്ന് നമ്മള്‍ വിളിച്ചത് അത് സൂര്യനെക്കാള്‍ 40,000 മടങ്ങ് വലിപ്പമുള്ള, ആകാശത്തെ ഏറ്റവും വലിയ നക്ഷത്രമായതുകൊണ്ടാണ് .

നമ്മുടെ വൃശ്ചികം രാശിയിലെ ഏറ്റവും തിളക്കമുള്ള Antares നക്ഷത്രം ആകാശത്ത് 15-ആമത്തെ ഏറ്റവും തിളക്കമുള്ള നക്ഷത്രമാണ്. പക്ഷേ അതിന് സൂര്യനെക്കാള്‍ വെറും 880 മടങ്ങ് മാത്രമാണ് വലിപ്പം. ഈ 40,000 എന്ന നമ്പര്‍ ഒക്കെ സാറിന്റെ ഒരു 'നമ്പര്‍' ആണ്. തിളക്കത്തില്‍ എട്ടാമത് നില്‍ക്കുന്ന, ഒറിയോണ്‍ നക്ഷത്രഗണത്തിലെ Betelgeuse നക്ഷത്രം പോലും സൂര്യനെക്കാള്‍ 1200 മടങ്ങ് വലിപ്പമുള്ളതാണ്. അതിനെയോ സൂര്യനെക്കാള്‍ 1500 മടങ്ങ് വലിപ്പമുള്ള CY Canis Majoris എന്ന നക്ഷത്രത്തെയോ പോലും 'പഴയ പുലികള്‍' ജ്യേഷ്ഠ എന്ന് വിളിച്ചില്ലല്ലോ! ഇനിയിപ്പോ ജ്യേഷ്ഠ എന്ന് വിളിക്കാതിരിക്കാന്‍ ഇവരെല്ലാം അച്ഛന്റെ മുന്‍ ഭാര്യയില്‍ ഉണ്ടായ മക്കളാണോ?

സത്യം 3: മിക്ക ഇരട്ടനക്ഷത്രങ്ങളും ഒരെണ്ണം മറ്റേതിനെ ചുറ്റി കറങ്ങുന്നതായാണ് കാണപ്പെടുന്നത് (ചിത്രം കാണിക്കുന്നു). എന്നാല്‍ അരുന്ധതി-വസിഷ്ഠ നക്ഷത്ര ജോഡികള്‍ പരസ്പരം കറങ്ങുകയാണ് ചെയ്യുന്നത്. ഇതും നമ്മള്‍ ആയിരക്കണക്കിന് വര്‍ഷം മുന്‍പേ മനസിലാക്കി അവരെ ഭാര്യാഭര്‍ത്താക്കന്‍മാര്‍ ആയി സങ്കല്‍പ്പിച്ചു.

ഗണപതിക്ക് വെച്ചതേ കാക്ക കൊണ്ടുപോയി സാര്‍! സാര്‍ പറഞ്ഞപോലെ മിക്ക നക്ഷത്രജോടികളും ഒന്ന് മറ്റൊണിനെ ചുറ്റുന്ന രീതിയില്‍ അല്ല എന്നുമാത്രമല്ല, എല്ലാ നക്ഷത്രജോടികളും അവയുടെ പൊതുവായ ഗുരുത്വകേന്ദ്രത്തെയാണ് ചുറ്റുന്നത്. നക്ഷത്രങ്ങള്‍ മാത്രമല്ല, ഭൂമി-ചന്ദ്രന്‍ ഉള്‍പ്പെടെ കറങ്ങുന്ന എല്ലാ ആകാശഗോളങ്ങളും ഇത് തന്നെയാണ് ചെയ്യുന്നത്. ഭൂമി-ചന്ദ്രന്‍മാരുടെ കാര്യത്തില്‍ ഗുരുത്വകേന്ദ്രം ഭൂമിയുടെ ഉള്ളില്‍ ആയതുകൊണ്ട് ചന്ദ്രന്‍ ഭൂമിയെ ചുറ്റുന്നതായി നമുക്ക് തോന്നുന്നു. സൌരയൂദത്തിന്റെ മൊത്തം ഗുരുത്വകേന്ദ്രം സൂര്യന്റെ ഉള്ളില്‍ ആയതുകൊണ്ട് മാത്രമാണ് ഗ്രഹങ്ങള്‍ സൂര്യനെ ചുറ്റുന്നതായി കാണുന്നത്. യഥാര്‍ത്ഥത്തില്‍ സൂര്യന്‍ ഉള്‍പ്പെടെ എല്ലാവരും ഒരു പൊതു ഗുരുത്വകേന്ദ്രത്തിന് ചുറ്റും കറങ്ങുകയാണ് ചെയ്യുന്നത്. ഏറ്റവും കോമണ്‍ എന്നുപറഞ്ഞു സാര്‍ കാണിക്കുന്ന ആദ്യ ചിത്രം പൊട്ടത്തെറ്റാണു.
ഇനി വസിഷ്ഠ-അരുന്ധതിമാരുടെ കാര്യം. Ursa Major എന്ന ഗണത്തിലെ Mizar - Alcor ജോഡികളെ ആണ് ഈ പറയുന്ന വസിഷ്ഠ-അരുന്ധതിമാര്‍ ആയിട്ട് ഭാരതീയജ്യോതിഷികള്‍ വിളിച്ചത്.  ഇവരെ രണ്ട് നക്ഷത്രങ്ങള്‍ ആയി തിരിച്ചറിഞ്ഞു അവരെ ദമ്പതികള്‍ ആയി കണക്കാക്കി എന്നതാണ് പഴമയുടെ മഹത്വമായി സാര്‍ പറയുന്നത്. മിക്ക ഇരട്ട നക്ഷത്രങ്ങളെയും വെറും കണ്ണുകൊണ്ട് രണ്ടായി തിരിച്ചറിയാന്‍ ബുദ്ധിമുട്ടാണ്. പക്ഷേ, പണ്ട് മുതലേ കണ്ണിന്റെ കാഴ്ച പരിശോധിക്കാന്‍ ഉപയോഗിക്കുന്ന ഒരു ലോക്കല്‍ ടെസ്റ്റ് ആണ് Mizar-Alcor ജോഡികളെ വേര്‍തിരിച്ചു കാണാന്‍ കഴിയുമോ എന്ന് നോക്കുന്നത്. ആവേറേജ് കാഴ്ചശക്തി ഉള്ള ഏതൊരാള്‍ക്കും നല്ല ആകാശത്തില്‍ ഇവയെ രണ്ടായി തിരിച്ചറിയാന്‍ കഴിയും. അതിന് അതിഭയങ്കരമായ ദൈവീകശക്തി വേണം എന്നാണ് സാര്‍ ഇവിടെ അര്‍ഥമാക്കുന്നത്. പക്ഷേ പിന്നീട് ശാസ്ത്രം കണ്ടെത്തിയത് Mizar-Alcor എന്നത് രണ്ട് നക്ഷത്രങ്ങള്‍ അല്ല, മറിച്ച് 6 നക്ഷത്രങ്ങള്‍ ഉള്‍പ്പെട്ട ഒരു വ്യൂഹമാണെന്നാണ്. ആറുപേര്‍ ഉള്‍പ്പെടുന്ന ഒരു വിവാഹബന്ധം സാര്‍ എങ്ങനെ വിശേഷിപ്പിക്കുമോ എന്തോ!

IIT യില്‍ നിന്നും Mathematics ഇല്‍ MSc എടുത്ത സാര്‍ ഇതൊന്നും Maths സിലബസില്‍ ഇല്ലായിരുന്നു എന്നുപറഞ്ഞു ഒഴിഞ്ഞുമാറുമോ?

24 comments:

  1. Good one. We need more people like you to demolish these fakes.

    ReplyDelete
  2. അല്ല ഗോക്രിക്കും ഉണ്ടല്ലോ ഇങ്ങിനെ കുറെ സര്‍ടിഫിക്കറ്റ് ...ഇങ്ങിനെ ഭാരത സംസ്കാരത്തെ കുറിച്ച് കുറെ ഉണ്ടാക്കി പറഞ്ഞാല്‍ ആര്‍ക്കും സര്‍ടിഫിക്കറ്റ് കിട്ടുമോ....?

    ReplyDelete
  3. നല്ല ലേഖനം. ഇത്തരക്കാരെ കളിയാക്കാന്‍ വേണ്ടി പോലും സാര്‍ എന്നൊന്നും വിളിക്കുന്നതു ശരിയല്ല. നമുക്കു വേണ്ടത് കൂടുതല്‍ കര്‍ക്കശമായ ഭാഷ തന്നെയാണ്.

    ReplyDelete
    Replies
    1. നമ്മുടെ റണ്‍വെ സിനിമയില്‍ ദിലീപിന്റെ ഒരു സാര്‍ വിളി ഇല്ലേ? അങ്ങനെ കൂട്ടിയാല്‍ മതി... :)

      Delete
  4. നമ്മുടെ പരമ്പരാഗത വിജ്ഞാനത്തെ തിരിച്ചറിയുന്നതും അതിലെ സത്യങ്ങളെപ്ഫറ്റി ഊറ്റം കൊള്ളുന്നതും മനസിലാക്കാവുന്നതാണു് ഒരതിരുവരെ നല്ലതുമാണു്. അവയെ മൊത്തമായി തള്ളഇപ്പറയുന്ന സ്വഭാവമുള്ള ചിലര്‍ ചെയ്യുന്നതു് അംഗീകരിക്കാനാവില്ല. എന്നാല്‍ ഇല്ലാത്തതു പറഞ്ഞു് അതു് വളരെ പെരുപ്പിച്ചു കാണിക്കുന്നവര്‍ െയ്യുന്നതു് രാജ്യത്തോടും നമ്മുടെ പൂര്‍വ്വികരോടുമുള്ള പരമദ്രോഹമാണു്.

    ReplyDelete
    Replies
    1. V.Sasi Kumar

      പരമ്പരാഗത വിജ്ഞാനത്തെ തിരിച്ചറിയുന്നതുപോലെത്തന്നെ, ഒരുപക്ഷേ അതിനേക്കാള്‍ പ്രധാനമാണ് പരമ്പരാഗത ഉഡായിപ്പുകളെ തിരിച്ചറിയുന്നതും അതിനെ പൊളിച്ചടുക്കേണ്ടതും. രണ്ടാമത്തേത് ചെയ്താലേ ആദ്യത്തേതിലേക്ക് എത്താന്‍ പറ്റൂ എന്നൊരു ‘ബുദ്ധിമുട്ടും’ആ പരിപാടിയില്‍ ഉണ്ട്. പിന്നെ, ഈ ‘നമ്മുടേത്’ മാത്രമായ പരമ്പരാഗത വിജ്ഞാനം എന്നൊന്ന് ഇന്നോളം കണ്ടിട്ടില്ല എവിടെയും. കൊടുക്കല്‍-വാങ്ങലുകളുടെ ഭാഗമായി കിട്ടിയതാണ് ഇന്നോളമുള്ള എല്ലാ വിജ്ഞാനങ്ങളും. മറിച്ച്, ഉഡായിപ്പുകളാകട്ടെ, പരമ്പരാഗതവും സ്വന്തമാണെന്നും ഒക്കെ പറയാം. തെറ്റില്ല.

      Delete
    2. തീര്‍ച്ചയായും നമുക്കൊക്കെ ഒരുപാട് അഭിമാനിക്കാന്‍ കഴിയുന്ന ഒരു പാരമ്പര്യം നമ്മുടെ രാജ്യത്തിനുണ്ട്. ദൈനംദിന ജീവിതവുമായി ബന്ധപ്പെട്ട അന്വേഷണങ്ങള്‍ക്കും അപ്പുറം പ്രപഞ്ചത്തിന്റെ ആഴം, സമയത്തിന്റെ അനന്തത എന്നിവയെക്കുറിച്ചൊക്കെ ഇത്രയേറെ ചിന്തിക്കുകയും എഴുതുകയും ചെയ്ത മറ്റൊരു പ്രാചീനസംസ്കാരം ഉണ്ടോ എന്ന്‍ സംശയമാണ്.

      Delete
    3. Vaisakhan Thampi,

      എല്ലാ സംസ്ക്കാരങ്ങളും ഒന്നല്ലെങ്കില്‍ മറ്റൊരു തരത്തില്‍ ഇവ്വിധമുള്ള (ദൈനംദിന ജീവിതവുമായി ബന്ധപ്പെട്ട അന്വേഷണങ്ങള്‍ക്കും അപ്പുറമുള്ള) അന്വേഷണങ്ങള്‍ നടത്തിയിട്ടുണ്ട് എന്നാണ് എന്റെ മനസ്സിലാക്കല്‍.മനുഷ്യസമൂഹം നടത്തിയ അന്വേഷണങ്ങള്‍ എന്ന നിലയ്ക്കാണ് അതിലുള്ള അഭിമാനത്തെ ഞാന്‍ കാണുന്നതും. അതല്ലാതെ,ഏതെങ്കിലും ജംബൂദ്വീപിന്റെയോ ആര്യാവര്‍ത്തത്തിന്റെയോ പ്രാക്തനഋഷിസമൂഹത്തിന്റെയോ കണ്ടുപിടുത്ത മഹാമഹം എന്ന നിലയ്ക്കല്ല.

      Delete
  5. തകര്‍ത്തു വൈശാഖന്‍...:-)

    ReplyDelete
  6. ഭൂമിയുടെ രൂപം വ്യക്തമാക്കിയ ആദ്യത്തെ ഫോട്ടോഗ്രാഫുകള്‍ അപ്പോളോയില്‍(1967-1972) നിന്നല്ല. Explorer-II എന്ന ബലൂണ്‍ ലഭ്യമാക്കിയ ചിത്രങ്ങളില്‍ ഭൂമിയുടെ ഗോളാകൃതി സ്ഥിരീകരിക്കാന്‍ തക്കവിധം തെളിവുകളുണ്ടായിരുന്നു. : http://en.wikipedia.org/wiki/Stratobowl. പിന്നെ, ലഭ്യമായ അറിവു പ്രകാരം, വലിപ്പത്തില്‍ 24-മതു സ്ഥാനം മാത്രമാണ് അന്റാറസ് എന്ന നക്ഷത്രത്തിനുള്ളത്. നമ്മുടെ ഗാലക്സിയില്‍ സൂര്യനേക്കാള്‍ 1500 മടങ്ങിലധികം വലിപ്പമുള്ള (solar radii) നക്ഷത്രങ്ങള്‍ ഉണ്ടാവാനിടയില്ല എന്നതിനു സിദ്ധാന്തങ്ങളുമുണ്ട് : http://en.wikipedia.org/wiki/Hayashi_limit. അപ്പൊ പിന്നെ 40000 എന്നത് അങ്ങേരു കയ്യില്‍ നിന്ന് ഇട്ട നമ്പരായിരിക്കും.

    ReplyDelete
  7. എല്ലാവരുടെയും അഭിപ്രായങ്ങള്‍ക്ക് നന്ദി. ഞാന്‍ ഒറ്റ എപിസോഡ് മാത്രമേ ഇവിടെ വിവരിച്ചിട്ടുള്ളൂ. ഏഴ് എപ്പിസോഡുകള്‍ നീണ്ടുനില്‍ക്കുന്ന ഒരു ആട്ടക്കഥയാണ് ഇത്. അതില്‍ ഒരു എപ്പിസോഡില്‍ തന്റെ ലക്ഷങ്ങള്‍ വിലയുള്ള ലാപ്ടോപ്പ് കണ്ടോ എന്നൊക്കെ പൊങ്ങച്ചം അടിക്കുന്നുണ്ട്. ഒരു ജ്യാതി സാധനം!

    ReplyDelete
  8. ഇത്തരം കോലങ്ങളെ പൊതുജനമദ്ധ്യത്തില്‍ തുറന്നു കാണിയ്ക്കാനുള്ള ശ്രമം മുന്നോട്ടു കൊണ്ടുപോകുക. ആശംസകള്‍.

    ReplyDelete
  9. ഇത്തരം തരക്കം ചിന്തിപ്പിക്കാനും പഠിക്കാനും അവസരം നല്‍കുന്നു .വൈശാഖന്‍ ഇടപെടല്‍ ഗംഭീരം

    ReplyDelete
  10. വളരെ നന്നായി വൈശാഖന്‍, ഫേസ്ബുക്കില്‍ ഇത് കുറച്ചു കാലം ആയി കിടന്നു കറങ്ങാന്‍ തുടങ്ങിയിട്ട്

    ReplyDelete
  11. അഭിനന്ദനങ്ങള്‍.....!!!!!11 ഇത്തരം എട്ടുകാലി മമ്മൂഞ്ഞ്മാരെ പോളിച്ചടുക്കാനുള്ള ശ്രമം തുടരുക.

    ReplyDelete
  12. വൈശാഖന്‍ സാറിനോട് ഒരു കാര്യം പറയാന്‍ ആഗ്രഹിക്കുന്നു...
    ചരിത്രങ്ങള്‍ മനുഷ്യ നിര്മിതിയാണ്....അതില്‍ എന്പതു ശതമാനവും സായിപ്പ് നിര്മിച്ചതനെന്നെ പറയാനൊക്കു...
    അവരുടെ സംസ്കാരത്തില്‍ ഒരു പതിനായിരം വര്‍ഷത്തില്‍ കൂടുതല്‍ പഴക്കം ഏതൊരു സംസ്കാരത്തിന് പഴമ നിര്‍ണയിച്ചു കൊടുക്കാന്‍ അവര്‍ അനുവ്ധിച്ചിട്ടില്ല....
    അങ്ങനെ വളച്ചും തിരിച്ചുമുണ്ടാക്കിയ ചരിത്രത്തില്‍ ഊന്നിയാണ് താങ്കളുടെ പ്രസ്താവനകള്‍.. ..
    ഇരിക്കുന്ന കൊമ്പ് മരം വെട്ടുകാര്‍ക്ക് മുറിച്ചു കൊടുത്തു സ്വയം മണ്ടനാവല്ലേ....
    ഇതുവരെ തണലും സുരക്ഷയും തന്ന ആ വലിയ മരത്തിനോട് ചെയ്യുന്ന അപരാധം ആണത്..

    ReplyDelete
  13. പിന്നെ ഈ പറയുന്ന വീഡിയോ ഞാന്‍ കണ്ടിട്ടില്ല...

    ReplyDelete
    Replies
    1. അയ്ശരി! അപ്പോ ഇവിടെ പറയുന്ന വീഡിയോ കാണാതെ എഴുതിയിരിക്കുന്നത് ഒന്നും മനസ്സിലാക്കാതെ കൊട്ടക്കണക്കിന് ഉപദേശങ്ങളുമായിട്ടു ഇറങ്ങിയെക്കുവാ ചേട്ടന്‍? ചരിത്രം മാത്രമേ ചേട്ടന്‍ മേലത്തെ ലേഖനത്തില്‍ കണ്ടുള്ളൂ അല്ലേ? സ്വയം മണ്ടനാവുന്നത് ആരാന്ന് ചേട്ടന്റെ കമന്‍റ് വായിക്കുമ്പോ തന്നെ എല്ലാര്‍ക്കും മനസ്സിലാവുന്നുണ്ട്.

      Delete
  14. simply brilliant Vaisakhan..you nailed this for sure. Keep your good work going. All the best :)

    ReplyDelete
  15. ഇങ്ങനെ പൊലിപ്പിച്ചു ഇല്ലാത്തതു പറയുന്നവര്‍ ചെയ്യുന്നത് "കുളിപ്പിച്ച് കുളിപ്പിച്ച് കുട്ടിയെ കൊല്ലുക " എന്ന ഏര്‍പാട് ആണ്. പക്ഷെ, എല്ലാത്തിനെയും തള്ളി പറയുന്നവരുടെയും അജണ്ട വികലമാണ് . പഴയതിനെ പൊടിപ്പും തൊങ്ങലും ഇല്ലാതെ വിശ്വസിക്കുകയും, അതില്‍ അഭിമാനം കൊണ്ട് വടിപോലെ നില്‍ക്കാതെ അതില്‍ പുരോഗതി കൈവരിക്കാന്‍ കഴിയുകയും ആണ് വേണ്ടത്

    ReplyDelete
  16. തകര്‍ത്തു വൈശാഖന്‍...:-)

    ReplyDelete
  17. I have just seen that video and confused.Here is another video attempt to debunk the holyman's claims..https://www.youtube.com/watch?v=RSHFzZmQPj0

    ReplyDelete