Jan 17, 2013

നമുക്കൊക്കെ തന്ത ഉണ്ടായത് എങ്ങനെ?

തന്തയ്ക്കു പിറക്കുക എന്നൊരു പ്രയോഗം നമ്മുടെ നാട്ടില്‍ ഉണ്ടല്ലോ! ഈ തന്തയ്ക്കു പിറക്കല്‍ എന്നതുകൊണ്ട് സമൂഹത്തില്‍ അന്തസ്സോടെ ജീവിക്കുന്നതിനുള്ള ഒരു അടിസ്ഥാന ക്വാളിഫിക്കേഷന്‍ ആണ് ഉദേശിക്കുന്നത്. ഇതിന് സമാനമായി തള്ളയ്ക്കു പിറക്കല്‍ എന്നൊരു ആശയം തീരെ കാണാറില്ല എന്നത് ശ്രദ്ധിക്കണം. സ്വഭാവികമായും, നമ്മുടെ സാമൂഹ്യ ചുറ്റുപാടില്‍ ഈ 'തന്ത' എന്ന അച്ഛന്‍ നമ്മുടെ അന്തസ്സില്‍ വഹിക്കുന്ന അനിഷേധ്യമായ പങ്ക് ഈ പ്രയോഗം എടുത്ത് കാട്ടുന്നു. ഒരുത്തനെ വെല്ലു വിളിക്കുമ്പോള്‍ "ഒറ്റ തന്തയ്ക്കു പിറന്നവന്‍ ആണെങ്കില്‍ വാടാ" എന്ന്‍ ആക്രോശിക്കുന്നതും  സ്വന്തം ആദര്‍ശം ഉയര്‍ത്തിക്കാട്ടാന്‍ "എനിക്കു തന്ത ഒന്നേയുള്ളൂ" എന്ന്‍ പറയുന്നതും എല്ലാം ഈ 'തന്ത'യ്ക്കു കല്‍പ്പിക്കപ്പെട്ടിരിക്കുന്ന സാര്‍വത്രിക പ്രാധാന്യം ആണ് കാണിക്കുന്നത്.

അപ്പോ ചോദ്യം ഇതാണ്- എങ്ങനെയാണ് നമുക്കൊക്കെ ഈ തന്ത ഉണ്ടായത്? ചോദ്യം ബയോളജി അല്ല, സാമൂഹ്യശാസ്ത്രമാണ്. എന്ന്‍ മുതലാണ് ഈ തന്ത എന്ന അച്ഛന്‍ ഇത്ര കേമന്‍ ആയത് എന്ന്‍?

മനുഷ്യന്‍ അവന്റെ സാമൂഹ്യജീവിതം ആരംഭിക്കുന്ന സമയത്ത് അവന് അച്ഛന്‍ എന്നൊരു ബന്ധമേ ഇല്ലായിരുന്നു എന്ന്‍ പിതൃത്വത്തിന്റെ മഹത്വം ഘോഷിക്കുമ്പോള്‍ നമ്മള്‍ അറിയാറുണ്ടോ? എന്നാല്‍ അങ്ങനെയാണ് ഇതുവരെയുള്ള പഠനങ്ങള്‍ എല്ലാം സൂചിപ്പിക്കുന്നത്. മനുഷ്യകുലത്തിന്റെ ആദ്യഘട്ടത്തില്‍ ആയിരക്കണക്കിന് വര്‍ഷങ്ങള്‍, അതായത് ഏതാണ്ട് പുരാതനശിലായുഗം മുഴുവനും, ആര്‍ക്കും തന്തയില്ലായിരുന്നു. എല്ലാവരും തന്തയില്ലാത്തവര്‍ ആയിരുന്നു. തീയും ചക്രവും ഒക്കെ കണ്ടുപിടിച്ച പോലെ ആദിമ മനുഷ്യന്‍ 'കണ്ടുപിടിച്ച' ഒരു കാര്യമാണ് 'അച്ഛന്‍' എന്ന പദവി. ലോകത്തെങ്ങുമുള്ള സംസ്കാരങ്ങളില്‍ ഏതാണ്ട് ഒരുപോലെ പടര്‍ന്ന പുരുഷമേധാവിത്തത്തിന്റെ തുടക്കം പിതൃത്വത്തിന്റെ കണ്ടുപിടിത്തത്തില്‍ നിന്നായിരുന്നുവത്രെ.

ഇങ്ങനെയാണ് ആ കഥ:
സ്ത്രീ-പുരുഷ ലൈംഗികബന്ധവും പ്രസവവും തമ്മിലുള്ള ബന്ധം ഇന്ന്‍ നമുക്ക് (പബ്ലിക്ക് ആയി സംസാരിക്കാന്‍ ഒരുപക്ഷേ മടി ഉണ്ടെങ്കിലും) വളരെ വ്യക്തമാണ്. പക്ഷേ, അന്ന്‍ അങ്ങനെ ആയിരുന്നില്ല. കാരണം അതിന് ഉടനടി തിരിച്ചറിയാന്‍ പറ്റുന്ന തെളിവുകള്‍ ഇല്ല എന്നതുതന്നെ. പുരുഷന്റെ ബീജവും സ്ത്രീയുടെ അണ്ഡകോശവും ചേരുന്ന ബീജസംയോഗപ്രക്രിയ നമുക്ക് കാണാന്‍ കഴിയില്ല, എന്നാല്‍ പുതിയ മനുഷ്യന്റെ ജനനം കാണാന്‍ കഴിയുന്നതാണ് താനും. ഇത് രണ്ടും തമ്മില്‍ ഏതാണ്ട് പത്ത് മാസത്തിന്റെ സമയവ്യത്യാസം ഉണ്ട് എന്നതിനാല്‍ തന്നെ ഇവ തമ്മിലുള്ള ബന്ധം അത്ര എളുപ്പത്തില്‍ മനസിലാക്കാന്‍ കഴിയുന്ന ഒന്നല്ല. അപ്പോപ്പിന്നെ ലൈഗികബന്ധവും പ്രസവവും തമ്മിലുള്ള ബന്ധം തീരെ അറിവുണ്ടായിരുന്നില്ല. അതുകൊണ്ട് തന്നെ ആയിരക്കണക്കിന് വര്‍ഷങ്ങള്‍ സ്ത്രീയെ ഗര്‍ഭിണി ആക്കുന്നതില്‍ പുരുഷന് പങ്കുണ്ട് എന്ന സത്യം മനുഷ്യന്‍ തിരിച്ചറിഞ്ഞതേയില്ല. തലമുറയുടെ നിര്‍മാണം എന്നത് സ്ത്രീയ്ക്ക് ജന്മനാ ഉള്ള ഒരു 'കഴിവ്' എന്ന രീതിയിലാണ് അന്ന്‍ കണക്കാക്കപ്പെട്ടത്. പുതിയ തലമുറയുടെ ജനയിത്രി എന്ന നിലയില്‍ 'മാതാവ്' സമൂഹത്തില്‍ പരമോന്നത സ്ഥാനം വഹിച്ചിരുന്നു. അന്ന്‍ സാമൂഹ്യവ്യവസ്ഥയില്‍ അനിഷേധ്യമായ പ്രഥമസ്ഥാനം സ്ത്രീയ്ക്കായിരുന്നു എന്ന്‍ തന്നെയാണ് വിദഗ്ദ്ധര്‍ അഭിപ്രായപ്പെടുന്നത്. അവള്‍ക്ക് പുതിയ തലമുറയെ സൃഷ്ടിക്കുന്നതിനും മുലയൂട്ടി വളര്‍ത്തുന്നതിനും ഉള്ള സാഹചര്യം ഒരുക്കിക്കൊടുക്കലും ആഹാരസംമ്പാദനവും ഒക്കെയായിരുന്നു അന്ന്‍ പുരുഷ വര്‍ഗത്തിന്റെ ജോലി.

നവീനശിലായുഗത്തിലേയ്ക്ക് കടന്നപ്പോഴേയ്ക്കും കൃഷിയും കന്നുകാലി വളര്‍ത്തലും ഒക്കെ പല മനുഷ്യസമൂഹങ്ങളിലും പതിവായി. കന്നുകാലികളില്‍ നടത്തിയ നിരീക്ഷണങ്ങളില്‍ നിന്നാണ് സ്ത്രീ-പുരുഷ ലൈഗികബന്ധത്തിന് പ്രത്യുല്‍പ്പാദനത്തില്‍ ഉള്ള പ്രാധാന്യം മനുഷ്യന്‍ മനസിലാക്കിയത് എന്ന്‍ കരുതപ്പെടുന്നു. വ്യക്തികളെ തമ്മില്‍ അടുപ്പിച്ച് നിര്‍ത്തുന്നതിനും ശാരീരികസന്തോഷത്തിനും ഒക്കെയുള്ള ഉപാധി എന്ന നിലയില്‍ മാത്രം സെക്സിനെ കണക്കാക്കിയിരുന്ന ഒരു സമൂഹത്തില്‍ സ്വാഭാവികമായും ഈ കണ്ടെത്തല്‍ വലിയ ചലനം സൃഷ്ടിക്കും എന്ന്‍ ഊഹിക്കാമല്ലോ. ഇത്രയും വിപ്ലവാത്മകമായ ഒരു കണ്ടെത്തല്‍ എല്ലാ സമൂഹങ്ങളിലേയ്ക്കും വളരെ വേഗം പടര്‍ന്നു. സ്ത്രീയെ മാത്രം പുതുതലമുറയുടെ ജനയിത്രിയായി കരുതി ജീവിച്ച് പോന്ന പുരുഷ വര്‍ഗത്തിന്റെ ഇച്ഛാഭംഗത്തിന് കിട്ടിയ വലിയൊരു ആശ്വാസമായിരുന്നു ഇത്. ഇത് അവരില്‍ ഒരു കോംപ്ലക്സിന് രൂപം കൊടുത്തിരിക്കാം എന്ന്‍ കരുതുന്നു. മരണനിരക്ക് ഇന്നത്തേതിനെക്കാള്‍ വളരെ കൂടുതലായിരുന്ന ആ കാലത്ത് ജീവിതത്തിന്റെ സിംഹഭാഗവും ഗര്‍ഭധാരണം, പ്രസവം, മുലയൂട്ടല്‍ തുടങ്ങിയ കാര്യങ്ങള്‍ക്കായി ചിലവഴിച്ചിരുന്ന സ്ത്രീയെക്കാള്‍ പേശീബലം വേട്ടക്കാരനായി ജീവിച്ച പുരുഷന്‍ നേടിയെടുത്തിരുന്നു. സ്ത്രീയെ അടിച്ചമര്‍ത്തി സ്വന്തം അധീശത്വം സ്ഥാപിച്ചുകൊണ്ടുള്ള ഒരു സമൂഹനിര്‍മാണത്തിലേയ്ക്ക് അവനെ നയിച്ചത് ഈ ഘടകങ്ങള്‍ ആയിരുന്നുവത്രെ. സ്വന്തം കുട്ടി എന്ന സങ്കല്‍പ്പം പുരുഷനില്‍ ഉണ്ടായതും, സെക്സിന് നിയന്ത്രണങ്ങളും മറ്റും കല്‍പ്പിക്കപ്പെട്ടതും ഇതിനെ തുടര്‍ന്നാണ്. ഇതൊക്കെ ചേര്‍ന്നാണ് ഇന്ന്‍ പരക്കെ കാണപ്പെടുന്ന സമൂഹമാതൃക രൂപം കൊള്ളുന്നത്. ഇതിനെ പല സമയങ്ങളില്‍ പല രൂപങ്ങളില്‍ ലോകത്തെ ഒട്ടുമിക്ക മനുഷ്യസാംസ്കാരിക കൂട്ടായ്മകളും സ്വീകരിക്കുകയായിരുന്നു. അവയ്ക്കു മേല്‍ കെട്ടിപ്പൊക്കിയ മതങ്ങളും, അവര്‍ നടപ്പാക്കിയ വ്യവസ്ഥിതികളും അവകള്‍ ജീവിതാധാരമായി കണ്ട് വളര്‍ന്ന് വന്ന പിന്‍തലമുറകളും ഈ രീതി അതേപടി തുടര്‍ന്നതിന്റെ ഫലമാണ് ഇന്നും സമൂഹത്തില്‍ വളരെ ആഴത്തില്‍ വേരോടിയിരിക്കുന്ന പുരുഷമേധാവിത്തമനോഭാവം. ഈ മേല്‍ക്കോയ്മാ മനോഭാവവും സ്വന്തം സമ്പാദ്യം തന്റെ കുഞ്ഞിന് തന്നെ കിട്ടണം എന്ന വാശിയില്‍ നിന്നുണ്ടായ സ്ത്രീയുടെ സ്വകാര്യവല്‍ക്കരണവും ആണ് അച്ഛന്‍ കേന്ദ്രമായ കുടുംബം എന്ന സങ്കല്‍പ്പത്തിന്റെ തുടക്കം എന്നും ചില വാദഗതികള്‍ നിലനില്‍ക്കുന്നു.

അപ്പോ അടുത്ത തവണ പിതൃത്വത്തിന്റെ മഹത്വം ഘോഷിക്കുമ്പോള്‍ നമുക്ക് ഇത് കൂടി ഓര്‍ക്കാം- നമുക്കൊക്കെ തന്തയുണ്ടായിട്ട് ഏതാണ്ട് 6000 വര്‍ഷങ്ങള്‍ ആവുന്നതേയുള്ളൂ. നമ്മളെ വീമ്പ് പറയിക്കുന്ന 'തന്തയ്ക്കു പിറക്കലിന്' പിന്നില്‍ പണ്ടെപ്പോഴോ പുരുഷന്‍ ബലമായി നേടിയെടുത്ത മേല്‍ക്കോയ്മയുടെ കൈത്താങ്ങ് മാത്രമാണുള്ളത്.

(പിന്‍കുറിപ്പ്: ലിംഗസമത്വത്തെ കുറിച്ചും അതിന്റെ വിവിധ വശങ്ങളെ കുറിച്ചും ഒരു ചര്‍ച്ച ഇവിടെ മനപ്പൂര്‍വം ഒഴിവാക്കുന്നു)


അവലംബം:
  1. The Origins of Fatherhood: An Ancient Family Process, Sebastian Kraemer B.A., Family Process, 2004

  2. http://en.wikipedia.org/wiki/Father

  3. http://en.wikipedia.org/wiki/Patriarchy

  4. And the back-references thereof 


Jan 12, 2013

We are all alone

You think you see us
You think you hear us
But we are not what you see
We are not what you hear
You don't know us
We don't even know ourselves
We don't know each other
All of us are alone,
Although there's in an 'us' in us.
We are lunatics
We are loved for what we aren't
We are pushed away for what we are
We think alone
We love alone
We laugh alone
And we cry alone

We are lunatics

Jan 8, 2013

കീബോര്‍ഡില്‍ മുളയ്ക്കുന്ന ശാസ്ത്രജ്ഞന്‍മാര്‍


പശു ചാണകമിടുന്ന ഊര്‍ജം കൊണ്ട് പ്രവര്‍ത്തിക്കുന്ന കറവയന്ത്രം, മഴപെയ്യുമ്പോള്‍ താനേ തുറക്കുന്ന സൌരോര്‍ജപ്രവര്‍ത്തിത കുട തുടങ്ങിയ തന്റെ ലോകോത്തര കണ്ടുപിടിത്തങ്ങള്‍ ഒരു പട്ടി പോലും തിരിഞ്ഞുനോക്കാത്തതില്‍ വല്ലാത്ത വിഷമത്തില്‍ ഇരിക്കുകയായിരുന്നു ശാസ്ത്രജ്ഞന്‍! ശാസ്ത്രജ്ഞന്‍മാരോട് ബഹുമാനം ഇല്ലാത്ത കണ്ട്രികളുടെ ലോകത്തെക്കാണല്ലോ തന്നെ ജനിപ്പിച്ച് തള്ളിയത് എന്നോര്‍ത്തു സ്വന്തം തന്ത-തള്ളമാരെ വരെ ചീത്ത വിളിച്ച് കൈമുട്ടിലെ വരട്ട് ചൊറിയില്‍ ചൂണ്ടാണി വിരല്‍ കൊണ്ട് ചൊറിഞ്ഞു സംവൃതരൂപങ്ങള്‍ തീര്‍ത്ത് ചാരുകസേരയില്‍ അങ്ങനെ കിടന്നു കുറെ നേരം. നാട്ടാരെ മാത്രം കുറ്റം പറഞ്ഞിട്ട് കാര്യമില്ല, സഹശാസ്ത്രജ്ഞന്‍മാരും കണക്കാ. അവനൊക്കെ പുതുമ വേണമത്രേ, പുതുമ! ഇതേ അവന്മാര്‍ തന്നെ ആനപ്പിണ്ടത്തില്‍ നിന്നും ആവി പറക്കുന്നത് ഐന്‍സ്റ്റെയിന്‍റെ ആപേക്ഷികതാ സിദ്ധാന്തത്തിന്റെ പരാജയമാണ് കാണിക്കുന്നത് എന്ന തന്റെ പുതുമയുള്ള കണ്ടുപിടിത്തത്തെയും പുച്ഛിച്ചു തള്ളി. ചൊറിഞ്ഞു ചൊറിഞ്ഞു തൊലി നീറി തുടങ്ങിയപ്പോള്‍ അല്പ നേരം റ്റീവി കണ്ടുകളയാം എന്ന്‍ തീരുമാനിച്ചു.

ചാനലുകള്‍ അങ്ങനെ മാറി മാറി പോയപ്പോള്‍ പെട്ടെന്നാണ് അമ്മച്ചിവിഷന്‍ ചാനലില്‍ ഒരു പരിപാടി ശ്രദ്ധയില്‍ പെട്ടത്. ഒരു മനുഷ്യന്‍ അങ്ങനെ വള്ളുവനാടന്‍ സ്ലാങ്ങില്‍ പ്രഭാഷണം നടത്തുകയാണ്. അദ്ദേഹവും ഒരു ശാസ്ത്രജ്ഞന്‍ ആണത്രേ. താഴെ ആ മഹാനുഭാവനുള്ള ഡിഗ്രികളുടെ ലിസ്റ്റ് ഒറ്റ സ്റ്റെപ്പില്‍ സ്ക്രീനില്‍ കൊള്ളാത്തതുകൊണ്ട് സ്ക്രോള്‍ ചെയ്തു കാണിക്കുന്നുണ്ട്. സംഗതി തനിക്കുള്ളതിനെക്കാള്‍ ഒരു ഡീ.ലിറ്റ് മാത്രമേ കൂടുതല്‍ ഉള്ളൂ. പക്ഷേ അദ്ദേഹം എവിടെക്കിടക്കുന്നു താന്‍ എവിടെക്കിടക്കുന്നു. എന്താവും ഇതിന്റെ സീക്രട്ട് എന്നറിയാന്‍ അല്പനേരം ആ പ്രസംഗം കേള്‍ക്കാന്‍ തന്നെ നമ്മുടെ ശാസ്ത്രജ്ഞന്‍ തീരുമാനിച്ചു.

പ്രഭാഷകന്‍ കത്തിക്കയറുകയാണ്. കണികാപരീക്ഷണശാല 6253 BC യില്‍ തന്നെ ഇന്ത്യയില്‍ പൂനെയ്ക്കു അടുത്ത്  ഉണ്ടായിരുന്നുവത്രേ. ഇന്‍റര്‍നാഷനല്‍ സ്പെയിസ് സ്റ്റേഷന്‍ പോലും പണ്ട് ഇന്ത്യക്കാര്‍ തെറ്റാടിയില്‍ റബ്ബര്‍ ബാന്‍ഡ് കൊരുത്ത് വലിച്ച് ആകാശത്തേക്ക് വിട്ടതാണത്രേ. ന്യൂട്ടന്‍സ് ലാ മുതല്‍ സ്ട്രിംഗ് തിയറി വരെ സകലതും ഇന്ത്യയില്‍ നിന്നും സായിപ്പന്മാര്‍ അടിച്ചു മാറ്റിയതാണത്രേ!  പൂട്ടിന് തേങ്ങാപ്പീര എന്ന്‍ പറഞ്ഞപോലെ സംസ്കൃതശ്ലോകങ്ങളുടെ അകമ്പടിയും ഉണ്ട്. പിന്നെ ഇതൊക്കെ നമ്മള്‍ പണ്ടേ കണ്ടുപിടിച്ചതാ എന്ന്‍ സമ്മതിച്ച കുറെ സായിപ്പന്മാരുടെ പേരുംകൂടി ഇടയ്ക്കിടെ ചേര്‍ക്കുന്നുണ്ട്. അങ്ങനെ ആകപ്പാടെ ജഗപൊക! എന്തൊരു കൈയടിയാണ് അദേഹത്തിന് കിട്ടുന്നത്! അയാള്‍ പറയുന്നതു മൊത്തമൊന്നും മനസിലായില്ല എങ്കിലും, ഒരു കാര്യം നമ്മുടെ ശാസ്ത്രജ്ഞന് മനസിലായി- സയന്‍സ്- സംസ്കൃതം, സംസ്കൃതം-സയന്‍സ് ഇങ്ങനെ മാറി മാറി പ്രയോഗിച്ചാല്‍ ആളുകള്‍ക്ക് ഇഷ്ടപ്പെടും. കാരണം ഇത് രണ്ടും പൊതുവേ ആളുകള്‍ക്ക് വല്യ പിടിയൊന്നും ഇല്ലാത്ത കാര്യങ്ങളാണ്. അവരെ സുഖിപ്പിച്ച് അവരുടെ എല്ലാവരുടെ ഉപ്പൂപ്പാമാര്‍ക്കും നൂറു ആനകള്‍ വീതം പണ്ട് ഉണ്ടായിരുന്നു എന്ന മട്ടില്‍ അങ്ങ് കീച്ചിയാല്‍ അതാണ് ജനത്തിന് ഏറ്റവും ഇഷ്ടപ്പെടുക. ഈയിടെയായി ഒരുപാട് മഹാന്മാര്‍ ഇത്തരം കണ്ടുപിടിത്തങ്ങള്‍ നടത്തി പ്രശസ്തരായിട്ടുണ്ട് എന്ന്‍ കേട്ടിരുന്നു. ഇപ്പോഴാണ് നേരില്‍ കണ്ടു ബോധ്യമായത്.

പരിപാടി കഴിഞ്ഞു. പ്രസംഗകന്‍ പ്രണാമം പറഞ്ഞ് പോയതും, പരിപാടി അവസാനിപ്പിച്ചുകൊണ്ട് ഒരു സംസ്കൃതഗാനം കേട്ടു തുടങ്ങി,
"ഓം ഭുര്‍ ഭൂവര്‍ സ്വഹ
തത് സവിതുര്‍വരേണ്യം... "
അങ്ങനെ പോകുന്ന ഒരു ഐറ്റം. ഇത് എവിടെയോ മുന്‍പ് കേട്ടിട്ടുണ്ട്, എന്താണ് സാധനം എന്നൊന്നും വല്യ പിടിയില്ല എങ്കിലും കേള്‍ക്കാന്‍ ഒരു രസമുണ്ട്.

പെട്ടെന്നാണ് ജനക്കൂട്ടത്തിന്റെ ഇടയിലോട്ട് സുരേഷ് ഗോപിയുടെ പോലീസ് വണ്ടി വരുന്നത് പോലെ ഒരു ആശയം നമ്മുടെ ശാസ്ത്രജ്ഞന്‍റെ തലയിലേക്ക് പാഞ്ഞുകയറി വരുന്നത്- എന്ത് കൊണ്ട് ഈ കേട്ട സാധനം വെച്ചു ഒരു അലക്ക് തനിക്കും അലക്കിക്കൂടാ!
പിന്നെ എല്ലാം സലീം കുമാര്‍ പറഞ്ഞപോലെ ശടപടെ ശടപടേന്നായിരുന്നു. പണ്ട് അച്ഛന്‍ വാങ്ങിച്ച് വെച്ച മന്ത്ര തന്ത്ര പുസ്തകങ്ങള്‍ ഒക്കെ വലിച്ചു വാരി പൊടി തട്ടി എടുത്തു. അധികം തപ്പിപ്പിടിച്ച് ബുദ്ധിമുട്ടേണ്ടി വന്നില്ല. ദാ കിടക്കുന്നു ടി സാധനം-

ഓം ഭൂർഭുവ: സ്വ:।
തത് സവിതുർവരേണ്യം।
ഭർഗോ ദേവസ്യ ധീമഹി।
ധിയോ യോ ന: പ്രചോദയാത്॥

ഋഗ്വേദം, യജുർവേദം, സാമവേദം എന്നിങ്ങനെ മൂന്ന് വേദങ്ങളിലും ഉള്ള ഒരു മന്ത്രമാണത്രേ അത്. ഗായത്രി മന്ത്രം എന്നാണത്രേ അതിന്റെ പേര്. ഗായത്രി എന്ന്‍ പറയുന്നതു യഥാര്‍ത്ഥത്തില്‍ അത് എഴുതിയിരിക്കുന്ന വൃത്തത്തിന്റെ പേരാണ്. സംഗതി സൂര്യദേവനോടുള്ള പ്രാര്‍ത്ഥനയാണ്, സൂര്യദേവന്‍ സകലലോകത്തെയും പ്രകാശിപ്പിക്കും പോലെ നമ്മുടെ ബുദ്ധിയെയും പ്രകാശിപ്പിക്കട്ടെ എന്നതാണ് സാരം. ഇതിനെ സാവിത്രി മന്ത്രം എന്നും വിളിക്കാറുണ്ട് പോലും. നിഷ്കാമ്യ ജപം എല്ലാ സിദ്ധികളും മോക്ഷവും നൽകുന്നു. 1008 ചുവന്ന മലർകളാൽ ഗായത്രി ഹോമം ചെയ്താൽ രാജകീയ പദവി തേടിയെത്തും. 1008 തവണ ഒഴുക്കുള്ള നദിയിൽ നിന്ന് ജപിച്ചാൽ സർവ്വ പാപങ്ങളും അകലും. ദിനംതോറും 1008 വീതം ഒരു വർഷം ജപിച്ചാൽ ത്രികാലജ്ഞാനം സിദ്ധിക്കും. രണ്ട് വർഷം ജപിച്ചാൽ അഷ്ടസിദ്ധികളും ലഭിക്കും. മൂന്ന് വർഷം ജപിച്ചാൽ പരകായ പ്രവേശം ചെയ്യാനുള്ള സിദ്ധി താനെ ഉണ്ടാകും. നാല് വർഷം ജപിച്ചാൽ ദേവജന്മം ലഭിക്കും.അഞ്ച് വർഷം ജപിച്ചാൽ ഇന്ദ്രനാവാം. ആറുവർഷം ജപിച്ചാൽ ബ്രഹ്മലോകവാസം ലഭിക്കും. ഏഴുവർഷം ജപിച്ചാൽ സൂര്യമണ്ഡലത്തിൽ ഗായത്രിദേവിയ്കൊപ്പം ഐക്യമാവാം എന്നൊക്കെയാണ് വിശ്വാസങ്ങള്‍.

ഇതൊക്കെ പണ്ട് ചെലവാകുമായിരുന്നു. ഇന്നത്തെക്കാലത്ത് പരകായപ്രവേശം നേടാമെന്നും സൂര്യമണ്ഡലത്തില്‍ കുഷ്യന്‍ സീറ്റ് കൊടുക്കാം എന്നൊന്നും പറഞ്ഞാല്‍ ഒരുമാതിരി സ്വബോധമുള്ള ഒരുത്തനും വിശ്വസിക്കാന്‍ പോണില്ല. അപ്പോ പിന്നെ പരിപാടി വേറൊന്നും അല്ല, ഇതെല്ലാം ഒടുക്കത്തെ സയന്‍സ് ആണെന്ന്‍ അങ്ങ് തള്ളുക. ഇനി തന്റെ വഴി അതാണെന്ന് താന്‍ തീരുമാനിച്ച് കഴിഞ്ഞു

കമ്പ്യൂട്ടര്‍ ഓണ്‍ ചെയ്തു. ഇപ്പോ അതാണ് ഏറ്റവും എളുപ്പമുള്ള വഴി, ഒരു ഈമെയില്‍ ആയോ ഫെയിസ്ബുക്ക് പോസ്റ്റ് ആയോ മറ്റോ ഇജ്ജാതി ഒരു സാധനം അങ്ങ് തിരുകിയാല്‍ മതി സംഗതി ചിക്കുന്‍ ഗുനിയ വൈറസ് പടര്‍ന്ന് പിടിക്കുന്നതിനെക്കാള്‍ വേഗത്തില്‍ ഇന്‍റര്‍നെറ്റ് ലോകത്ത് പടര്‍ന്ന് കയറിക്കോളും. ആയിരക്കണക്കിന് ആളുകള്‍ അത് പരസ്പരം കൈമാറും, മഹത്തരം, informative എന്നൊക്കെ കമന്‍റ് ഇടും, ഇത് പറഞ്ഞു തന്ന സാറിന് നന്ദി അര്‍പ്പിക്കും.... അങ്ങനെ പിന്നെ മൊത്തം കുളിരുകോരുന്ന പരിപാടികള്‍ ആണ്.

ഫെയിസ്ബുക്ക് തുറന്നു. 'Write a Note'-ല്‍ ആവേശത്തോടെ ഒരു ഞെക്ക് ഞെക്കി.
ടും! കളിക്കളം റെഡി. ഇനി കളി തുടങ്ങാം- ആദ്യം വേണ്ടത് ഒരു സായിപ്പിന്റെ പേരാണ്. അതിനാണോ പഞ്ഞം, തലേന്ന്‍ കണ്ട ഹോളിവുഡ് സിനിമയിലെ നായകകഥാപാത്രത്തിന്റെ പേരിലെ ആദ്യ ഭാഗമായ Howard-നോട് താന്‍ തന്നെ കാച്ചിയെടുത്ത Steingeril എന്നൊരു പേര് കൂട്ടിച്ചേര്‍ത്ത് തുടക്കത്തില്‍ ശാസ്ത്രജ്ഞന്‍ ആണെന്ന്‍ മനസിലാക്കാന്‍ ഒരു 'ഡോക്ടര്‍' കൂടി ഫിറ്റ് ചെയ്ത് ഒരു ശാസ്ത്രജ്ഞനെ അങ്ങ് ഉണ്ടാക്കി- Dr. Howard Steingeril! കിടിലന്‍ പേര്! കേട്ടാലേ തോന്നും അതിഭയങ്കരനായ ശാസ്ത്രജ്ഞന്‍ ആണെന്ന്.
അരിസ്റ്റോട്ടില്‍ മുതല്‍ സ്റ്റീഫന്‍ ഹോക്കിങ് വരെ സകല ശാസ്ത്രജ്ഞന്‍മാരേയും മനസില്‍ ധ്യാനിച്ചു "പടച്ചോനേ ഇങ്ങള് കാത്തോളീന്നു" പറഞ്ഞുകൊണ്ടു ഒരു എഴുത്തങ്ങോട്ട് എഴുതി-

GAYATRI MANTRA THE BEST DIVINE PRAYER HYMN IN THE WORLD!
SAID AMERICAN SCIENTIST Dr.HOWARD STEINGERIL  Dr.Howard Steingeril, an American scientist, collected Mantras, Hymns and invocations from all over the world and from all religions, tested their strength in his Physiology Laboratory.
He concluded that the Hindus Vedic Gayatri Mantra is the most rewarding scientifically. That the Gayathri Mantra produced 110,000 sound waves per second. This was the highest and  found it to be the most powerful prayer hymn in the world. 
That the combination of sound and variation in the sound waves and its particular frequency is capable of developing specific spiritual potentialities.
The Hamburg university initiated this research into the efficacy of the Gayathri Mantra both on the mental and physical plane of CREATION...
The GAYATHRI MANTRA is now being broadcast daily for 15 minutes from 7 P.M. onwards over Radio Paramaribo, Surinam, South America for the past two years, and also in Amsterdam, Holland for the last six months

ഇതില്‍ തന്നെ '110,000 sound waves per second' എന്നൊക്കെ എഴുതിയപ്പോള്‍ അല്പ്പം മനസാക്ഷിക്കുത്തൊക്കെ തോന്നി എങ്കിലും എത്ര വലിയ പാട്ടും, അത് പല പല ട്രാക്കുകള്‍ ചേര്‍ന്ന ഏ.ആര്‍.റഹ്മാന്‍റെ പാട്ട് ആയാല്‍ പോലും അത് ഒറ്റ ഒരു sound wave ആണ് എന്നൊക്കെ നമ്മുടെ പൊതുജനത്തിന് അറിയാമായിരുന്നു എങ്കില്‍ നമ്മുടെ നാട് പണ്ടേ  രക്ഷപെടുമായിരുന്നല്ലോ. പിന്നെ Hamburg University-യുടെ കാര്യം, ഇത് വായിച്ചിട്ട് അവിടത്തെ ഗവേഷണം കാണാന്‍ ആരാ ഇപ്പോ ജര്‍മനിയിലോട്ട് പ്ലെയിന്‍ കേറാന്‍ പോകുന്നത്? ചുമ്മാ കിടക്കട്ടെ ഒരു വെയിറ്റിന്. അവസാനം എഴുതിയ സ്ഥലങ്ങളുടെ കാര്യവും അത് തന്നെ- സൌത്ത് അമേരിക്കയില്‍ സുരിനാം എന്നൊരു രാജ്യം ഉണ്ടെന്ന് തന്നെ ഇവിടെ എത്ര പേര്‍ക്ക് അറിയാം? ഉണ്ടെങ്കില്‍ തന്നെ അവിടെന്നും ആംസ്റ്റര്‍ഡാമില്‍ നിന്നുമൊക്കെയുള്ള റേഡിയോ സംപ്രേഷണം ഇവിടെ ഇപ്പോ ആരാ കേള്‍ക്കാന്‍ പോണത്? പിന്നെ mental and physical plane of creation- എന്നൊക്കെ പറഞ്ഞ വല്ല സാധനവും ലോകത്ത് ഉണ്ടോ എന്നറിയില്ല. എന്നാലും കിടക്കട്ടെ, ഇനി ചിലപ്പോള്‍ ബിരിയാണി കൊടുക്കുന്നുണ്ടെങ്കിലോ!!

അങ്ങനെ എഴുതി നിര്‍ത്തി, ഒന്ന്‍ നെടുവീര്‍പ്പിട്ട ശേഷം ശാസ്ത്രജ്ഞന്‍ ഒന്നുകൂടി അതൊക്കെ ഒന്ന്‍ വായിച്ചുനോക്കി. വല്ലാത്ത അഭിമാനം അങ്ങനെ തിളച്ചു പൊന്തി വന്നപ്പോള്‍, കൊടുത്തു ഒരു ക്ലിക്ക്- Publish!

അവിടന്നങ്ങോട്ട് വെച്ചടി വെച്ചടി കയറ്റമല്ലായിരുന്നോ? എത്രയെത്ര മെയിലുകള്‍, ബ്ലോഗ് പോസ്റ്റുകള്‍, എത്രയെത്ര ഫെയിസ്ബുക്ക് ഷെയറുകള്‍, എത്രയെത്ര ലൈക്കുകള്‍...
ഇപ്പൊഴും ഏതോ ഒരു സ്ഥലത്തു ഏതോ ഒരു ഐ.പി.അഡ്രസ്സില്‍ ഇരുന്നു നമ്മുടെ ശാസ്ത്രജ്ഞന്‍ ഇതൊക്കെ കണ്ട് അഭിമാനത്തോടെ പുഞ്ചിരിക്കുന്നുണ്ടാവും.

Jan 4, 2013

ഇനിയെത്ര കാലമെന്നറിയില്ല

ഇനിയെത്ര കാലമെന്നറിയില്ല,
ഇനിയെത്ര കാതമെന്നറിയില്ല
പലര്‍ പോയ വഴിയിലൂടെങ്ങോട്ടെന്നറിയാതെ
വടു വീണ പാദം വലിച്ചിഴയ്ക്കാം
നിണം വാര്‍ന്ന മുറിവിലേക്കെരിവെയില്‍ ചാലിച്ച
വേദന ലഹരിയായ് ആസ്വദിക്കാം
കാലം ഉണക്കാത്ത കണ്ണുനീര്‍ച്ചാലുകള്‍
ഉയിരിന്നുറവപോല്‍ കാത്തുവെക്കാം
ചീറിയടുക്കും കരിങ്കല്‍ചീളുകള്‍
വിരിമാറിലാദ്യന്തമേറ്റുവാങ്ങാം
വയ്യ, തടുക്കുവാനാവതില്ല
ഓടിയൊളിക്കുവാനറിവുമില്ല
മുന്നിലോ പിന്നിലോ ആരുമില്ല
കൂടെനടക്കുവാനാളുമില്ല
ഏകനാണേകനാണന്നുമിന്നും
ഏകാന്തമൂകമാണീയരങ്ങ്

പലര്‍ പോയ വഴിയിലൂടെങ്ങോട്ടെന്നറിയാതെ
വീണ്ടും, വടു വീണ പാദം വലിച്ചിഴയ്ക്കാം

ഇനിയെത്ര കാലമെന്നറിയില്ല,
ഇനിയെത്ര കാതമെന്നറിയില്ല