Apr 18, 2015

വഴി പറഞ്ഞുകൊടുക്കൽ!

വഴി പറഞ്ഞുകൊടുക്കൽ എന്നത് ഒരു സവിശേഷ കഴിവാണെന്ന് തോന്നിയിട്ടുണ്ട്. നമ്മളത് തിരിച്ചറിയുന്നത്, ആ കഴിവില്ലാത്തവർ വഴി പറഞ്ഞുതരുമ്പോഴായിരിക്കും. ചില ആളുകളെ പരിചയമുണ്ട്- അവർക്ക് ഏതാണ്ടെല്ലാ സ്ഥലങ്ങളും പരിചിതമാണ്. പക്ഷേ അവര് പറഞ്ഞുതരുന്ന വഴി അനുസരിച്ച് ഒരിയ്ക്കലും ഉദ്ദേശിക്കുന്നിടത്ത് എത്താനാവില്ല. മോശം വഴി പറച്ചിലുകാർക്കുള്ള ചില പോരായ്മകൾ നിരീക്ഷിച്ചിട്ടുണ്ട്.
  • കേൾക്കുന്ന ആളിന് താൻ പറയുന്ന സ്ഥലങ്ങൾ എത്രത്തോളം പരിചിതമാണ് എന്നതിനെക്കുറിച്ച് ആലോചിക്കാതിരിക്കൽ- പറയുന്ന ആൾ വളരെ ഉറപ്പോടെയാണ് ഓരോ തിരിവുകളും സ്ഥലപ്പേരുകളും പറയുന്നതെങ്കിൽ പോലും ആദ്യമായി ആ സ്ഥലത്തുകൂടി പോകാൻ പോകുന്നയാളെ സംബന്ധിച്ച് രണ്ടോ മൂന്നോ തിരിവുകളും അത്ര തന്നെ സ്ഥലപ്പേരുകളും കേൾക്കുന്നതോടെ മിക്കവാറും കൺഫ്യൂഷനാവും. (ഒരുപാട് തിരിവുകളുള്ള വഴിയാണെങ്കിൽ ഞാൻ ആദ്യത്തെ രണ്ട് തിരിവുകൾ കഴിഞ്ഞ് ആളുകൾ ധാരാളം കാണാൻ ചാൻസുള്ള സ്ഥലപ്പേര് പറഞ്ഞുകൊടുത്തിട്ട് ബാക്കി അവിടെ ആരോടെങ്കിലും ചോദിക്കാൻ പറയും)
  • ദൂരം സമയത്തിലാക്കി പറയൽ- "അവിടന്ന് അഞ്ച് മിനിറ്റ് പോയിട്ട് ഇടത്തോട്ട് തിരിയണം..." എന്നൊക്കെ ചിലർ പറയും. അഞ്ച് മിനിറ്റ് കൊണ്ട് പലരും പല ദൂരമായിരിക്കും സഞ്ചരിക്കുന്നത്. തെറ്റായ തിരിവ് എടുക്കുന്നതോടെ കളി കൈവിട്ട് പോകും.
  • അടയാളങ്ങൾ തെരെഞ്ഞെടുക്കുന്നതിലെ അപാകതകൾ- പെട്ടെന്ന് കാണാൻ സാധ്യതയില്ലാത്ത അടയാളങ്ങൾ, വാഹനത്തിൽ പോകുന്നവരോട് വളവിലും മറുവശത്തുമൊക്കെയുള്ള കടകളുടെ പേരുകൾ, എന്നുവേണ്ട മതിലിൽ ഒട്ടിച്ചിരിക്കുന്ന സിനിമാ പോസ്റ്റർ വരെ അടയാളം പറഞ്ഞുകൊടുക്കുന്നവരെ കണ്ടിട്ടുണ്ട്.
ഇനിയും ഉണ്ടാവില്ലേ പലതും?

(വഴി പറഞ്ഞുകൊടുക്കുന്ന സമയത്ത് തോന്നിയിട്ടുള്ള ഒരു ബുദ്ധിമുട്ട് തെക്കോട്ട്, കിഴക്കോട്ട് എന്നൊക്കെ പറഞ്ഞാൽ ഭൂരിഭാഗം പേർക്കും അത് മനസിലാവില്ല എന്നതാണ്. ജ്യോതിശാസ്ത്രത്തിൽ കമ്പമുള്ളതുകൊണ്ട് എനിക്ക് പലപ്പോഴും ആദ്യം വായിൽ വരുന്നത് ഈ ദിശകളായിരിക്കും. സമപ്രായക്കാരാണെങ്കിൽ അതിന് തെറിവിളി ഏതാണ്ട് ഉറപ്പാണ്. "മനുഷ്യന് മനസിലാവുന്ന ഭാഷയിൽ പറയടാ"-ന്ന് പറയും അവർ)

1 comment:

  1. മറുനാട്ടുകാരായ ആളുകൾ നമ്മുടെ നാട്ടിൽ പൊതുഗതാഗതസൗകര്യം ഉപയോഗിക്കുമ്പോൾ നേരിടുന്ന ഒരു പ്രധാനപ്രശ്നം റൂട്ട് നമ്പർ ഇല്ലെന്നതാണ്.

    ReplyDelete