Jul 7, 2015

30 ഡിഗ്രി ‘ചൂട്’ ആകുന്നതെങ്ങനെ?

റേഡിയോയിലോ ടീവിയിലോ അന്തരീക്ഷ താപനില പറയുന്നത് ശ്രദ്ധിച്ചിട്ടുണ്ടാകും. കേരളത്തിലെ ശരാശരി താപനില ഏതാണ്ട് 30 ഡിഗ്രി സെൽസ്യസിനോട് അടുപ്പിച്ചാണ്. മിക്കപ്പോഴും അത് മുപ്പതിൽ താഴെ ആയിരിക്കുകയും ചെയ്യും. പക്ഷേ നമ്മുടെ ശരീരത്തിന്റെ ശരാശരി താപനില എത്രയാണെന്ന് സ്കൂളിൽ പഠിച്ചത് ഓർമ്മയുണ്ടോ? 37 ഡിഗ്രി. ഇനിയാണ് ചോദ്യം, ശരാശരി 37 ഡിഗ്രി ചൂടുമായി നടക്കുന്ന നമുക്ക് 30 ഡിഗ്രി മാത്രം താപനിലയുള്ള അന്തരീക്ഷത്തിൽ ചൂടനുഭവപ്പെടുന്നത് എങ്ങനെയാണ്?

ഇവിടെയാണ് പ്രശ്നം. കാലാവസ്ഥാ വാർത്തകളിൽ പറയുന്ന അന്തരീക്ഷ താപനിലയായിരിക്കില്ല, നമുക്ക് ‘അനുഭവപ്പെടുന്ന താപനില’. നമ്മുടെ ശരീരത്തിന്റെ താപനിയന്ത്രണ സംവിധാനത്തിന്റെ (Thermoregulation) രീതിയാണ് ഇവിടെ പൊരുത്തക്കേട് ഉണ്ടാക്കുന്നത്. ശരീരത്തിലുണ്ടാകുന്ന അധികതാപം പുറത്തുകളയാൻ നമ്മുടെ ശരീരം പ്രധാനമായും ഉപയോഗിക്കുന്നത് വിയർക്കലിനെയാണ് (sweating) എന്നറിയാമല്ലോ. തൊലിക്കരികിലെ വിയർപ്പുഗ്രന്ഥികളിലൂടെ പുറത്തുവരുന്ന വിയർപ്പ് ശരീരത്തിൽ നിന്നും താപം ആഗിരണം ചെയ്ത് ബാഷ്പമായി (vapor) പോകുന്നതുവഴിയാണ് ശരീരത്തിന്റെ താപനില കുറയുന്നത്. ഒരാൾ ശരാശരി 6 ലിറ്റർ വിയർപ്പ് ഇതുപോലെ ബാഷ്പീകരിച്ച് കളയുന്നുണ്ട് എന്നാണ് കണക്ക്. ഇത് അവിശ്വസനീയമായി തോന്നിയേക്കാം. കാരണം, പുറത്തുവന്നയുടൻ ബാഷ്പീകരിച്ചുപോകാവുന്നതിലും അധികം വിയർപ്പ് പുറത്തുവന്ന് ശരീരത്തിൽ വലിയ തുള്ളികളായി രൂപം കൊള്ളുമ്പോൾ മാത്രമേ നമ്മൾ സാധാരണ ഭാഷയിൽ ‘വിയർക്കുന്നു’ എന്നു പറയാറുള്ളു.  സത്യത്തിൽ ശരീരം എപ്പോഴും വിയർക്കുന്നുണ്ട്. വെയിലേൽക്കുമ്പോഴോ, ശാരീരികമായി അധ്വാനിക്കുമ്പോഴോ ഒക്കെ നമ്മൾ നന്നായി വിയർക്കുന്നത് ശരീരത്തിലുണ്ടായ അധികതാപം പുറത്തുകളയുന്നതിനായിട്ടാണ്. ഇനി ഇതേ വിയർപ്പോടുകൂടി ഫാനിന് കീഴെ ചെന്നുനിന്നാൽ നല്ല തണുപ്പ് അനുഭവപ്പെടുന്നതായി ശ്രദ്ധിച്ചിട്ടില്ലേ? കാറ്റ് വിയർപ്പിന്റെ ബാഷ്പീകരണവേഗത കൂട്ടുന്നതുകൊണ്ടാണത്. കൂടുതൽ വേഗത്തിൽ ബാഷ്പീകരണം നടന്നാൽ കൂടുതൽ വേഗത്തിൽ ശരീരതാപവും കുറയും (വിയർപ്പുഗ്രന്ഥികൾ താരതമ്യേന കുറവായ നായ പോലുള്ള ജീവികൾ, വായിലും പരിസരത്തുമുള്ള നനവുള്ള ഭാഗങ്ങളിലൂടെ ഇതുപോലെ ബാഷ്പീകരണം നടത്തുവാനായാണ് അണയ്ക്കുന്നത്) ഇവിടെയാണ് മറ്റൊരു വില്ലൻ കടന്നുവരുന്നത്- ആർദ്രത അഥവാ ഹ്യുമിഡിറ്റി. അന്തരീക്ഷത്തിലുള്ള ജലബാഷ്പത്തിന്റെ അളവാണത്. ശരീരത്തിൽ നിന്നും ബാഷ്പമായി മാറുന്ന വിയർപ്പ് അന്തരീക്ഷത്തിലേക്കാണല്ലോ ചെല്ലുന്നത്. ആ അന്തരീക്ഷത്തിൽ ജലബാഷ്പം കൂടുതലായിരുന്നാൽ വിയർപ്പ് ബാഷ്പമാകുന്ന നിരക്കും അതിനനുസരിച്ച് കുറയും. അതോടെ താപം ശരീരത്തിന് പുറത്തേയ്ക്ക് കളയുന്നതും പതിയെ ആകുമെന്ന് പറയണ്ടല്ലോ. അതുകൊണ്ട് പുറത്ത് താപനില കുറവായിരുന്നാൽ പോലും ഹ്യുമിഡിറ്റി കൂടിയിരുന്നാൽ താപനിലയും കൂടുതലായി നമുക്ക് അനുഭവപ്പെടും. നമുക്ക് അനുഭവപ്പെടുന്ന താപനില (apparent temperature) അറിയുവാനായി പൊതുവേ ഹീറ്റ് ഇൻഡക്സ് (heat index) എന്ന സൂചകമാണ് ഉപയോഗിക്കുന്നത്. അന്തരീക്ഷ താപനിലയേയും ആപേക്ഷിക ആർദ്രതയേയും (relative humidity) ചേർത്ത് ഒരു സമവാക്യം വഴി ബന്ധിപ്പിച്ചാണ് ഇത് കണക്കാക്കുന്നത്. ഇന്ന് ഇതെഴുതുമ്പോൾ തിരുവനന്തപുരത്തെ താപനില 31 ഡിഗ്രി സെൽസ്യസും ആപേക്ഷിക ആർദ്രത 66% ഉം ആണ്. ഈ സാഹചര്യത്തിൽ ഇവിടത്തെ ഹീറ്റ് ഇൻഡക്സ് 36.4 ഡിഗ്രി ആണ്. അതായത്, ഏതാണ്ട് ശരീര താപനിലയോട് അടുത്തെത്തിക്കഴിഞ്ഞു. അതുകൊണ്ട് തന്നെ എനിയ്ക്ക് അന്തരീക്ഷത്തിലെ 31 ഡിഗ്രി ‘തണുപ്പ്’ ആയിട്ട് അനുഭവപ്പെടില്ല. ഇനി ഇവിടെ ആപേക്ഷിക ആർദ്രത 80% (ചില മാസങ്ങളിൽ ഇവിടെ 90 വരെയൊക്കെ പോയിട്ടുണ്ട്) ആയിരുന്നെങ്കിൽ ഹീറ്റ് ഇൻഡക്സ് ഏതാണ്ട് 41 ഡിഗ്രി ആയി മാറിയേനെ. അതെനിക്ക് ചൂടുള്ള കാലാവസ്ഥയായി അനുഭവപ്പെടും. പക്ഷേ അതേ സമയം ഞാൻ 31 ഡിഗ്രി ചൂടുള്ള വെള്ളത്തിൽ തൊട്ടെന്നിരിക്കട്ടെ. എനിക്കത് ‘തണുത്ത’ വെള്ളമായി തന്നെ അനുഭവപ്പെടും. കാരണം 37 ഡിഗ്രി ചൂടുള്ള ശരീരത്തിൽ നിന്നും ആ വെള്ളത്തിലേക്ക് നേരിട്ട്  താപം പ്രവഹിക്കും, എന്റെ വിരലറ്റം തണുക്കും. അതായത് പറഞ്ഞുവന്നത്, ഒരു സ്ഥലത്തെ കാലാവസ്ഥ ചോദിക്കുമ്പോൾ താപനിലയോടൊപ്പം തന്നെ അവിടത്തെ ആപേക്ഷിക ആർദ്രത കൂടി ശ്രദ്ധിക്കണം എന്നർത്ഥം. 

ഹീറ്റ് ഇൻഡക്സ് കണക്കാക്കാൻ സമവാക്യം നേരിട്ട് ഉപയോഗിക്കണമെന്നില്ല. ചില വെബ്സൈറ്റുകൾ അത് നേരിട്ട് കണക്കാക്കിത്തരും. ഉദാഹരണം: http://www.calcunation.com/calculators/weights%20and%20measures/heat-index-celsius.php)
എളുപ്പത്തിന് താഴെ കാണുന്ന ചാർട്ടും ഉപയോഗിക്കാം.

ചൂടുള്ള ദിവസങ്ങളിൽ ചെറിയ മഴ പെയ്താൽ അന്തരീക്ഷ താപനില കുറയുന്നതിനുപകരം കൂടുന്നതായി അനുഭവപ്പെടുന്നത് എന്തുകൊണ്ടാണെന്ന് ഇനി ഊഹിക്കാമോ?

വാൽക്കഷണം- താപനിലയ്ക്കും ആർദ്രതയ്ക്കും ഒപ്പം കാറ്റിനെക്കൂടി പരിഗണിക്കുന്ന Wind chill എന്നൊരു സൂചകവും നിലവിലുണ്ട്

7 comments:

  1. I had wished if such a quantity combining temperature and humidity existed. Never tried to see if one already exists though! Thanks a lot for enlightening!

    ReplyDelete
    Replies
    1. And there is even a quantity combining temperature, humidity and wind speed. :)

      Delete
  2. Great information. Our nation need more people who thinks like you and Dr Viswanathan

    ReplyDelete
  3. thnak you...it is informative...

    ReplyDelete
  4. ഡോക്ടർ മനോജ്‌ വെള്ളനാടൻ ഷെയർ ചെയ്ത ലിങ്കിൽ കയറി വന്നതാണു.നല്ല ലേഖനം.ആശംസോൾസ്‌!!!!

    ReplyDelete
    Replies
    1. മനോജ് എന്നെയും ഇവിടെ എത്തിച്ചു

      Delete