Jul 24, 2015

കൊല്ലേണ്ടിടത്ത് കൊന്നുതന്നെ ആകണം


മറ്റ് ജീവിവർഗങ്ങളെക്കാൾ മഹത്തരമായ, ആരോ സ്വർഗത്തിൽ നിന്ന് നേരിട്ട് കെട്ടിറക്കിയ മുതലുകളാണ് തങ്ങൾ എന്ന അഹന്ത മനുഷ്യനുണ്ട്. ഒട്ടുമിക്ക മതങ്ങളും ഒളിഞ്ഞും തെളിഞ്ഞും ഈ ആശയത്തെയാണ് ഉദ്ഘോഷിക്കുന്നതും. ഇതാണ് തെരുവുനായകളുടെ കാര്യത്തിലും പലരുടേയും അഭിപ്രായങ്ങളെ നയിക്കുന്നത്. കൊല്ലുക എന്ന പ്രവൃത്തി ഒരു ജീവിയുടെ ജീവിക്കാനുള്ള അവകാശത്തെ കവർന്നെടുക്കലാണ് എന്ന രാഷ്ട്രീയമായ ന്യായമല്ല അവരിൽ പലരുടേതും. പകരം, കൊല്ലുക എന്ന പ്രവൃത്തി ക്രൂരമാണ്, സഹജീവികളോടുള്ള സ്നേഹമില്ലായ്മയാണ്, ദൈവം കൊടുത്ത ജീവൻ മനുഷ്യൻ എടുക്കുകയാണ് തുടങ്ങിയ വൈകാരികമോ മതപരമോ ആയ ന്യായങ്ങളാണധികവും. 

കൊല്ലുക അല്ലെങ്കിൽ ജീവനെടുക്കുക എന്നത് ജീവലോകത്തിലെ ഒരു അടിസ്ഥാന പ്രക്രിയയാണ്. ഭക്ഷ്യശൃംഖലയുടേയും അതുവഴി മൊത്തം പരിസ്ഥിതിയുടേയും വരെ സന്തുലനത്തിന്റെ ആണിക്കല്ലാണത്. കൊല്ലുക എന്ന പ്രവൃത്തിയുടെ ഗുണദോഷമാണ് വിഷയമെങ്കിൽ അത് ആര് എന്തിനുവേണ്ടി ചെയ്യുന്നു എന്നത് മാനദണ്ഡമാകരുതല്ലോ. ഭൂമിയിലെ അവസാനത്തെ മാനിന് പിറകേ ഭൂമിയിലെ അവസാനത്തെ സിംഹം ഓടുകയാണെങ്കിൽ നമ്മൾ ആരുടെ ഭാഗത്താണ് നിൽക്കേണ്ടത്?  പക്ഷേ ഒരു മാനിനെ വേട്ടവിനോദത്തിന്റെ ഭാഗമായി ഒരു മനുഷ്യൻ കൊല്ലുന്നതും വിശപ്പ് മാറ്റാനായി ഒരു സിംഹം കൊല്ലുന്നതും തമ്മിൽ വ്യത്യാസമുണ്ട്. ആദ്യത്തേത് വെറും ക്രൂരതയും രണ്ടാമത്തേത് ആഹരണമെന്ന ജീവപ്രവൃത്തിയുമാണ്. മാനസാന്തരപ്പെട്ട്, കൊലപാതകമെന്ന ‘പാപകർമം’ ഉപേക്ഷിച്ച് സിംഹങ്ങൾക്ക് വെജിറ്റേറിയനാവാൻ സാധിക്കില്ല. ഇനി സാധിച്ചാൽ തന്നെ മാനുകൾ ക്രമാതീതമായി എണ്ണത്തിൽ പെറ്റുപെരുകിയാൽ അതാ പ്രകൃതിയുടെ സന്തുലനാവസ്ഥയെ തകിടം മറിക്കാനേ ഉപകരിക്കൂ. പ്രകൃതിസന്തുലനം എന്ന സൂക്ഷ്മമായ ബാലൻസിനെ പറ്റി സ്കൂൾ ക്ലാസുകളിൽ വരെ നമ്മൾ പഠിക്കുന്നുമുണ്ട്. മനുഷ്യൻ മനുഷ്യനെ കൊല്ലുന്നത് തെറ്റാകുന്നത് അത് തെറ്റാണെന്ന് വിശുദ്ധപുസ്തകത്തിൽ എഴുതിയിരിക്കുന്നതുകൊണ്ടല്ല, അത് ജീവിക്കാനുള്ള ഒരു പൗരന്റെ മൗലികാവകാശത്തിന് മേലുള്ള കടന്നുകയറ്റമാണ് എന്ന ലളിതമായ, അതേസമയം ഗൗരവകരമായ, രാഷ്ട്രീയ കാരണം കൊണ്ടാണ്. ജീവനെടുക്കുക എന്നത് പാപമാണ് എങ്കിൽ കൊതുകിനെ കൊല്ലുന്നതും വാഴ വെട്ടുന്നതും ഒക്കെ പാപമായിത്തന്നെ കണക്കാക്കണം. ഒരു കൊതുകിലും കോഴിയിലും ഉള്ള അതേ ജീവൻ തന്നെയാണ് മനുഷ്യനിലും ഉള്ളത്. അല്ലാതെ ജീവന്റെ അളവ് പറയുമ്പോൾ കിലോഗ്രാമിലോ ലിറ്ററിലോ quantify ചെയ്യാവുന്ന ഒന്നും അതിലില്ല്ലല്ലോ. സാമാന്യമായി കൊല്ലുക എന്ന പ്രവൃത്തിയുടെ ഗുണദോഷം ചികയുകയാണെങ്കിൽ കൊല്ലേണ്ടിടത്ത് കൊന്നുതന്നെയാകണം എന്നാണ് എന്റെ നിലപാട്. 

തെരുവ് നായകൾ എവിടെനിന്നാണ് വരുന്നത്? അവ താനേ ഉണ്ടാകുന്നതല്ല. സ്വാഭാവികമായി നായകൾ ഉണ്ടാകാൻ സാധ്യതയില്ലാത്തിടത്ത് മനുഷ്യന്റെ ഇടപെടൽ കൊണ്ട് സൃഷ്ടിക്കപ്പെട്ട ജീവികളാണവ. നായക്കുട്ടികളെ വളർത്തുകയും വളർന്ന് ഓമനത്തം നഷ്ടപ്പെടുമ്പോൾ ഇറക്കിവിടുകയും ചെയ്യുന്ന ആളുകളെ കണ്ടിട്ടുണ്ട്. അലക്ഷ്യമായി ഭക്ഷണപദാർത്ഥങ്ങൾ പരിസ്ഥിതിയിലേക്ക് വലിച്ചെറിയുന്ന സമൂഹം അവയെ പരോക്ഷമായി തീറ്റിപ്പോറ്റുകയും പ്രജനനം നടത്തി പെരുകാനുള്ള അവസരം കൊടുക്കുകയും ചെയ്യുന്നു. കേരളത്തിലെ സാഹചര്യത്തിൽ ഇന്ന് ലക്ഷക്കണക്കിന് തെരുവുനായകളാണ് ഇങ്ങനെ അലഞ്ഞുനടക്കുന്നത്. ഇവയിൽ ഏതൊക്കെ എപ്പോഴൊക്കെ ആക്രമണകാരികളാകും എന്ന് ആർക്കും പറയാനാവില്ല. തിരുനന്തപുരം നഗരത്തിൽ മാത്രം ഇതിനകം ഒരുമാസം 300 കേസുകളാണ് റിപ്പോർട്ട് ചെയ്യപ്പെട്ടത് (സംസ്ഥാനത്താകമാനം ഒരു വർഷം 40,000 ആണ് കണക്കെന്ന് കേൾക്കുന്നു). ഒരു പിഞ്ച് കുഞ്ഞു കൊല്ലപ്പെടുന്ന സംഭവം വരെ ഉണ്ടായി. അപ്പോഴും ഓർക്കേണ്ടത് ഇത് മനുഷ്യൻ തന്നെ വരുത്തിവെച്ച വിനയാണ് എന്നതാണ്. പരിസ്ഥിതിയിൽ വിവേകപൂർവം ഇടപെടാതെ കാര്യങ്ങളെ ലാഘവബുദ്ധിയോടെ സമീപിച്ചതിന്റെ ഫലമാണിത്. ഇത് ഇത്രയും വഷളായ സാഹചര്യത്തിൽ അലഞ്ഞ് നടക്കുന്ന ലക്ഷക്കണക്കിന് നായകളെ തപ്പിപ്പിടിച്ച് വന്ധ്യംകരിക്കുന്നതിനും പുനരധിവസിപ്പിക്കുന്നതിനും വേണ്ടിവരുന്ന അധ്വാനവും ചെലവും എത്രയോ വലുതാണ്. ആ തുകയും വിഭവശേഷിയും പൊതുജനാരോഗ്യം പോലുള്ള മേഖലകളിലേക്ക് പോകുന്നതാണ് കൂടുതൽ നല്ലത്. പട്ടികടിച്ച എല്ലാവർക്കും വാക്സിനെടുക്കാനുള്ള സംവിധാനം പോലും നിലവിലില്ലാത്ത സ്ഥിതിയ്ക്ക് പ്രത്യേകിച്ചും. ഉത്തരവാദിത്വമുള്ള സർക്കാർ പൗരനെയാണ് സംരക്ഷിക്കേണ്ടത്, പൗരന്റെ തെറ്റുകളെയല്ല. മനുഷ്യൻ കൂടുതുറന്നുവിട്ട ഈ വിനയ്ക്ക് ഫലപ്രദമായ പരിഹാരം ഇവയെ കൊന്നുകളയുക എന്നതുതന്നെയാണ്. 

ഇപ്പറഞ്ഞത് കേൾക്കുമ്പോൾ ക്രൂരമായി തോന്നിയേക്കാമെങ്കിലും ഇത് ചരിത്രത്തിലെ ആദ്യ സംഭവമൊന്നും ആകാൻ പോകുന്നില്ല. പരിസ്ഥിതി സംരക്ഷണത്തിന് വേണ്ടി, എന്നുവച്ചാൽ പരിസ്ഥിതിയിലെ മുഴുവൻ ജീവികളുടേയും നല്ലതിന് വേണ്ടി, ലക്ഷക്കണക്കിന് ജീവികളെ കൂട്ടക്കൊല തന്നെ ചെയ്യേണ്ടിവന്ന സാഹചര്യം മുൻപും ഉണ്ടായിട്ടുണ്ട്. പരിസ്ഥിതിയ്ക്കോ സമ്പദ്‌വ്യവസ്ഥയ്ക്കോ മനുഷ്യന്റെ ആരോഗ്യത്തിനോ ഹാനികരമാകുന്ന വിധത്തിൽ, ഒരു ജീവവർഗം അത് സ്വാഭാവികമായി കണ്ടുവരാത്ത സാഹചര്യങ്ങളിൽ പെറ്റുപെരുകിയാൽ അതിനെ Invasive species എന്ന് വിളിക്കും. പലപ്പോഴും മനുഷ്യന്റെ തന്നെ ഇടപെടലാണ് ഇതിലേക്ക് വഴിതെളിക്കുന്നത്. ഗാലപ്പഗോസ് ദ്വീപുകളിൽ ക്രമാതീതമായി പെരുകി അവിടത്തെ സസ്യജാലങ്ങളുടെ മൊത്തം നിലനിൽപിന് ഭീഷണിയായ ലക്ഷക്കണക്കിന് ആടുകളെ വെടിവെച്ചുകൊന്ന സംഭവമാകണം ഇതിൽ ഏറ്റവും പ്രസിദ്ധം. ഈ ‘പരിസ്ഥിതിപ്രവർത്തന’ത്തെപ്പറ്റി (അത് തന്നെയാണ് വാക്ക്) നേച്ചർ മാഗസീനിൽ വന്ന വാർത്ത ഇവിടെ വായിക്കാം. മറ്റൊന്ന് ഇന്ന് അറ്റ്ലാന്റിക് സമുദ്രത്തിൽ ക്രമാതീതമായി പെരുകുന്ന ലയൺഫിഷുകളാണ്. അറ്റ്ലാന്റിക് അവയുടെ സ്വാഭാവിക ആവാസമല്ല. വളർത്തുമൃഗങ്ങളെ കയറ്റിയ കപ്പലുകളിൽ നിന്നോ വീടുകളിൽ നിന്ന് അധികം വന്ന മീനുകളെ മനുഷ്യർ കടലിലേക്ക് വിട്ടതിനെ തുടർന്നോ ആണെന്ന് കരുതുന്നു അവ അറ്റ്ലാന്റിക്കിലെത്തിയത്. അവിടെ ലയൺഫിഷുകളെ സ്വാഭാവികമായി ഭക്ഷണമാക്കുന്ന മറ്റ് ജലജീവികളൊന്നും ഇല്ലാത്തതിനാൽ ഇവ അവിടെ പെറ്റുപെരുകി ഇപ്പോ മറ്റ് ചെറിയ ജീവികളുടെ നിലനിൽപിന് തന്നെ ഭീഷണിയായിരിക്കുന്നു. ഇതിനെക്കുറിച്ചുള്ള വാർത്ത ഇവിടെ വായിക്കാം. ഇതേ സ്ഥാനത്താണ് നമ്മൾ തെരുവുനായകളേയും കാണേണ്ടത്. മനുഷ്യന്റെ തന്നെ നിലനില്പിന് ഭീഷണിയാകുന്ന തരത്തിൽ തെരുവുകളെ ബാധിക്കുന്ന Invasive species ആണ് അവ. അവയെ ഉന്മൂലനം ചെയ്യുകയും ഇനിയെങ്കിലും ഇങ്ങനെ നിയന്ത്രണാതീതമായി ജീവികൾ പെരുകുന്ന സാഹചര്യം ഒഴിവാക്കാനായി ജനത്തിനെ ബോധവൽക്കരിക്കുകയുമാണ് ഇപ്പോൾ ചെയ്യേണ്ടത്. 

മൃഗസ്നേഹവും മനുഷ്യത്വവും ഒക്കെ എടുത്തുയർത്തി പട്ടികളെ വെറുതേ വിടണമെന്നും സർക്കാർ ഏറ്റെടുത്ത് വളർത്തണമെന്നുമൊക്കെ പറയുന്നത് വെറും പൊള്ളയായ വാദങ്ങളാണ്. റോഡിൽ നടക്കുന്നവർക്ക് മാത്രമാണല്ലോ തെരുവുപട്ടിയെ പേടിക്കേണ്ടത്. മാംസം കഴിക്കുന്നവരെല്ലാം ബാർബേറിയൻസാണ് എന്ന മട്ടിൽ, വെജിറ്റേറിയൻ മാത്രമേ കഴിക്കൂ എന്ന് വാശിപിടിക്കുന്ന ചിലർ ‘pure vegetarian’ എന്നുപറഞ്ഞ് സ്വയം ‘purity’ പ്രഖ്യാപനം നടത്തുന്നത് കണ്ടിട്ടുണ്ട്. പൊരിവെയിലത്തും മടുപ്പിക്കുന്ന ശബ്ദഘോഷത്തിനിടയിലും ഒക്കെ മണിക്കൂറുകളോളം ഞെരിപിരി കൊള്ളുന്ന മിണ്ടാപ്രാണികളെ പ്രോത്സാഹിപ്പിച്ച്, ആനപ്രേമി എന്ന് സ്വയം വിശേഷിപ്പിക്കുന്ന ആളുകളുള്ള നാട്ടിലാണ് സഹപൗരരുടെ ജീവന് തന്നെ ഭീഷണിയാവുന്ന സാഹചര്യത്തിൽ വില്ലൻ പക്ഷത്തേയ്ക്ക് മനുഷ്യത്വവാദവുമായി ചെല്ലുന്നത്. കൊല്ലുക എന്ന പ്രക്രിയ പരമാവധി മൃഗത്തിന് വേദനയും കഷ്ടപ്പാടും കുറഞ്ഞിരിക്കുന്ന വിധത്തിൽ ചെയ്യുക എന്നതാണ് ഇവിടെ പ്രായോഗികമായ മനുഷ്യത്വം.

6 comments:

  1. ഇതുവായിച്ച് ഒരു മറുപടി തരും എന്ന് പ്രതീക്ഷിക്കുന്നു. കോലാഹലത്തില്‍ നായകളുടെ പ്രശ്നങ്ങളെ കുറച്ച് എഴുതിയ ആര്‍ട്ടിക്കിളിനെ ആധാരമാക്കിയുള്ള മറുപടി ആണ്. എന്റെ പരിമിതമായ അറിവില്‍ നിന്നും ഞാന്‍ മനസിലാക്കിയ കാര്യങ്ങള്‍ പങ്കു വക്കുന്നു. ഇത് ഒരു നല്ല ഡിസ്കഷന്‍ ആകുമെന്ന് പ്രതീക്ഷിക്കുന്നു.

    ആര്‍ട്ടിക്കിളില്‍ നിന്നും ഞാന്‍ മനസിലാക്കിയ പ്രധാന പൊയിന്റുകള്‍ :
    "1. നായകളേ ഒരു invasive species ആയി കാണണം. അവയെ കൊല്ലുന്നതാണ് അവ കാരണം നമ്മുക്ക് ഇന്ന് ഉണ്ടാകുന്ന പ്രശ്നങ്ങള്‍ക്കുള്ള ഏറ്റവും നല്ല പ്രായോഗികമായ ആയ വഴി.
    2. മനുഷ്യനെ കൊല്ലരുത് എന്ന് പറയുന്നതിന് മൗലികാവകാശങ്ങളിലേക്കുള്ള കടന്നുകയറ്റത്തിന്റെ പ്രശ്നം ഉണ്ട്. മറ്റ് മൃഗങ്ങളേ . അതേതായാലും കൊല്ലുന്നത് തുല്യമാണ്. അത് പാടില്ല എന്ന് പറയുന്നവര്‍ ആ യുക്തി പ്രകാരം കൊതുകിനേയും കൊല്ലാന്‍ പാടില്ല.
    3. Invasive species നെ ഒഴിവാക്കുന്നതിനൊപ്പം അവ ഇന്നി ഉണ്ടാകാതിരിക്കാനുള്ള ബോധവല്കരണത്തെ കുറിച്ചും പറയുന്നുണ്ട്.
    4. പിന്നെ ചൂണ്ടികാണിക്കുന്ന ഒരു വാദം അവയെ വെറുതെ വിട്ടിട്ട് സര്‍ക്കാര്‍ ഏറ്റടുകണം
    5. ആനയെ പൂരത്തിനിറക്കുന്നു നാട്ടുകാരോടാണോ മനുഷ്യത്വവാദവുമായി ചെല്ലുന്നത് എന്ന ചോദ്യം

    ഈ ആര്‍ട്ടികിളില്‍ പറഞ്ഞിരിക്കുന്ന ബാക്കി കാര്യങ്ങള്‍ മതമൗലികവാദികളേയും പാരമ്പര്യവാദികളേയും ഒക്കെ കുറിച്ചായതുകൊണ്ട് അത് ഞാന്‍ ഒഴിവാക്കുന്നു.

    തെരുവ് നായകളുടെ പ്രശ്നം പരിഹരിക്കപെടേണ്ടതു തന്നെയാണ്. അത് ഇത്രയധികം പെരുകാന്‍ മനുഷ്യന്‍ തന്നെയാണ് കാരണമെന്നത് ഇവ പരിഹരിക്കാതിരിക്കാനുള്ള കാരണമാകുന്നതേ ഇല്ല. അപ്പോള്‍ എന്തൊക്കെയാണ് നമ്മള്‍ ശ്രദ്ധിക്കണ്ടത് :
    1.അവ പരിഹരിക്കാന്‍ തിരഞ്ഞെടുക്കുന്ന രീതിയില്‍ കഴിയുന്നത്ര ശാസ്ത്രിയത കൊണ്ടുവരിക. അതായത് ജനങ്ങളെ താല്കാലികമായി തണുപ്പിക്കാന്‍ എന്തെങ്കിലും ചെയ്യതാലും ഫലപ്രധവും ദീര്‍ഘായുസ്സുമുള്ള ഒന്നായിരിക്കണം അവ.
    2.അവ നിലവിലുള്ള നിയമങ്ങളുടെ ലംഘനം ആകരുത്. അത് കൂടിയേ തീരു എന്ന അവസ്ഥ വന്നാല്‍ പോലും മാറ്റങ്ങള്‍ ഉടനെ പ്രാബല്യത്തില്‍ കൊണ്ടുവരാനുള്ള മാര്‍ഗ്ഗങ്ങള്‍ നമ്മുക്കുണ്ട്.
    3.ചിലവ് കുറക്കാന്‍ കഴിയുന്നത്ര കുറക്കുക.
    4. ഇതിന്റെ കൂടെ, ഒരു ബോണസ് ആയി, മനുഷ്വത്തപരമായ രീതി പറ്റുമെങ്കില്‍ അത് തിരഞ്ഞെടുക്കുക.

    മുകളില്‍ പറഞ്ഞിരിക്കുന്നതില്‍ ഒന്നാമ്മത്തെെയും മൂന്നാമത്തെയും ഗുണങ്ങള്‍ കണക്കിലെടുത്താല്‍ കൊന്നുകളയലാണ് ശരിയായ രീതി എന്നാണ് വാദം. ആ വാദം ശരിയാണോ ?
    നിയമപരമായി stray dogsനെ കൊല്ലാന്‍ പാടില്ല. The Animal Birth Control (Dogs) Rules, 2001. എഴുതിചേര്‍ത്തതില്‍ പിന്നെ തെരുവ് നായകള്‍ കൊണ്ടുണ്ടാകുന്ന പ്രശ്നങ്ങള്‍ പരിഹരിക്കണ്ടത് Sterlization പ്രോഗ്രാമില്ലൂടെ ആണ്. അതായത് Stray Dogsനെ കൊന്നു തള്ളുന്നത് നിയമവിരുദ്ധം ആണ്. ഇന്നി ഇത് വരാനുള്ള സാഹചര്യം കൂടി പരിശോധിക്കുകയാണെങ്കില്‍ പല കാര്യങ്ങളിലും വ്യക്തത വരും. Delhi muncipalityയില്‍ ഉണ്ടായ തെരുവ് നായ പ്രശ്നവുമായി നടന്ന പഠനങ്ങളുടെയും വാദങ്ങളുടെയും ഫലമാണ് ഈ നിയമത്തിലേക്ക് നയിച്ചത്. അന്ന് കോടതിയില്‍ അവതരിപിച്ച ചില കണക്കുകള്‍ ശ്രദ്ധേയമാണ്. 1980ല്‍ ഡെല്ഹിയില്‍ പട്ടികളുടെ കണകെടുത്തപ്പോള്‍ 1.5 ലക്ഷം പട്ടികള്‍ ഉണ്ടെന്നാണ് അറിയാന്‍ കഴിഞ്ഞത്. 1980-1990 കാലഘട്ടതില്‍ ഈ പ്രശ്നം പരിഹരിക്കുന്നതിനായി 8 ലക്ഷം പട്ടികളെ കൊന്നൊടുക്കി. 1990 കണകെടുപ്പില്‍ കണ്ടെത്താന്‍ കഴിഞ്ഞത് പത്ത് വര്‍ഷം കൊണ്ട് ലക്ഷകണക്കിന് പട്ടിയെ കൊന്നൊടുക്കിയിട്ടും പട്ടികളുടെ എണ്ണം 1.5 ലക്ഷം തന്നെ. ഈ പ്രോഗ്രാം പൂര്‍ണമായും പരാജയം ആയിരുന്നു. ഇത്രയധികം പട്ടികളെ കൊന്നുകളഞ്ഞതോ വളരെ ക്രൂരമായ രീതികളിലാണ്. sterlization ചെയ്യാന്‍ കാശില്ല എന്ന് പറയുന്നവര്‍ തന്നെ മനുഷ്യത്വമായി കൊല്ലല്‍ അവകാശപെടാറുണ്ട്. ഇത്രയധികം നായകളെ കൊല്ലല്‍ ചിലവും വൈദഗ്ദ്ധ്യവു നിറഞ്ഞ ഒന്നാണെന്നും മനസിലാക്കണം. അതില്‍ പൊരായ്മയും തിരുമറിയും ഉറപ്പായി വരുകയും, പട്ടാളകാരുടെ ശവപെട്ടിയില്‍ കൈയ്യിട്ടുവാരുന്ന ആള്‍കാരുള്ള രാജ്യമാണ് , അങ്ങനെയുള്ള നാട്ടില്‍ ഇതിനായി മാറ്റി വക്കുന്ന കാശില്‍ തിരുമറികള്‍ നടന്നതും നായകള്‍ അനുഭവിച്ചതിലും അത്ഭുതപെടാന്‍ ഒന്നുമില്ല. ഇത് ഒരറ്റപെട്ട സംഭവം അല്ല. പല പഠനങ്ങളും കൊന്നുതള്ളുക എന്നത് ഗുണം ചെയ്യില്ല എന്ന് കാണിച്ചിട്ടുണ്ട്. WHOയും നായകളെ കൊല്ലുന്നതല്ല Sterlization ചെയ്യുന്നതാണ് "strat dog menace"ന് പരിഹാരം എന്ന് പറഞ്ഞിട്ടുണ്ട്. എന്തുകൊണ്ട് ഇത് ശരി ആകുന്നില്ല എന്നത് സ്റ്റാറ്റിക്സ് ഉപയോഗിച്ചു മാത്രം പറയുന്ന ഒന്നല്ല. വളരെ ലോജിക്കല്‍ ആയ പല കാരണങ്ങളുണ്ട്, അതില്‍ ചിലത് വിവരിക്കാം :

    ReplyDelete
  2. 1)പട്ടികളെ കൊന്നുതള്ളുക ഒരിക്കലും പ്രാവര്‍ത്തികമാകില്ല. കുറെ പട്ടികളെ കൊല്ലുമ്പോള്‍ ബാക്കി വരുന്ന പട്ടികള്‍ക്ക് പെറ്റ് പെരുകാന്‍ കുടുതല്‍ ആഹാരവും സാഹചര്യവും ഒരുങ്ങുന്നു. പഴെ പോപുലേഷനിലേക്ക് തിരികെയെത്തുന്നു. പല കണക്കുകളും അത് പലവട്ടം നമ്മുക്കത് കാണിച്ചു തന്നിട്ടുണ്ട്.
    2) പട്ടികളെ മുഴുവനായി ഉന്മൂലനം ചെയ്യാന്‍ കഴിയാത്തതിന് മറ്റൊരു കാരണം dog migration ആണ്. റൂറല്‍ പ്രദേശങ്ങളില്‍ നിന്നും ഉള്‍പ്രദേഷങ്ങളില്‍ നിന്നുമെല്ലാം ചേക്കേറുന്ന പട്ടികള്‍ എണ്ണം കൂട്ടും എന്നു മാത്രമല്ല മറ്റ് ജീവികളോട് (foxes) കൂടുതല്‍ ഇടപഴകുന്നതു കാരണം അവ rabies പോലെയുള്ള രോഗങ്ങള്‍ പകര്‍ത്താനുള്ള സാധ്യത കൂടുതലും ആണ്.
    3)തെരുവില്‍ കാണുന്ന നായകളിലെ ഒരു ഏറിയ പങ്ക് പെണ്‍പട്ടികളെ ഉപേക്ഷിച്ച് ആണ്‍ പട്ടികളെ വളര്‍ത്തുന്ന നായവളര്‍ത്തുന്നവരുടെ പ്രവണത ആണ്. രോഗം ബാധിച്ച ( skin disease, ticks, accidents etc) നായകളെ തെരുവില്‍ ഉപേക്ഷിക്കുന്നവര്‍ വേറെയും. അവ തടയാന്‍ എങ്ങനെ കഴിയും.
    4) പൊതുവേ പട്ടി പിടുത്തകാര്‍ കൊല്ലുന്നത്, കഷ്ടപാടും അപകടവും കാരണമാകാം, അപകടകാരികള്‍ ആയ നായകളേ അല്ല. മനുഷ്യനോട് ഇണങ്ങി ജീവിക്കുന്നവയെ കൊന്നുതള്ളുകയും അപകടകാരികളായ നായകളെ പെറ്റുപെരുകാന്‍ അവസരം ഉണ്ടാക്കുകയും ആണ് ചെയ്യുന്നത്.

    ഇനി ഇതെല്ലാം എങ്ങനെയെങ്കിലും കഴിഞ്ഞു എന്നിരിക്കട്ടെ അതായത് നായകളെ ഒന്നില്ലാതെ കൊന്നുതള്ളുകയും പുറത്തുനിന്നോ പട്ടിവളര്‍ത്തുന്നവരില്‍ നിന്നോ ഒറ്റനായ്കളും തെരുവില്‍ ഇല്ല എന്ന് ഉറപ്പ് വരുത്തിയെന്നും ഇരിക്കട്ടെ, അത് വരുത്തിവചേക്കാവുന്ന മറ്റ് പ്രശ്നങ്ങളും നമ്മള്‍ക്ക് കാണാതിരിക്കാന്‍ കഴിയില്ല. അവയില്‍ പ്രധാനം തെരുവ് നായകളുടെ ഇരകളുടെ (Prey) വളര്‍ച്ച തന്നെ. എലി ആണ് അവയില്‍ ഏറ്റവും പ്രശ്നകാരന്‍. എലികള്‍ ജനിച്ച് ആറ് ആഴ്ച കൊണ്ട് പെറ്റ് പെരുകാന്‍മാത്രം വളരും. അതായത് കണക്ക് പ്രകാരം ഒര് ജോഡി എലികള്‍ ഒര് വര്‍ഷം കൊണ്ട് 35,000 എലികള്‍ വരെ ഉണ്ടാക്കാം. ഈ അപകടം ഉണ്ടാകാതിരിക്കാന്‍ ആര് എന്താണ് ചെയ്യുന്നത് ? എലികളുടെ കാരണം ഉണ്ടാകുന്ന രോഗങ്ങള്‍ ബാധിച്ചുവരുന്ന 10,000 കേസുകള്‍ വരെ രേഖപെടുത്താറുണ്ട്. ഇവക്ക് വെണ്ടി മുന്സിപാലിറ്റികള്‍ ഒന്നും ചെയ്യുന്നില്ല എന്ന് മാത്രം അല്ല അവ തടയുന്ന പട്ടികളെ കോന്നും കളയുന്നു. Anthropocentric ആയി നമ്മള്‍ ചെയ്യുന്ന പല കാര്യങ്ങളും ഒട്ടും പ്രതീക്ഷിക്കാത്ത തിരിച്ചടികള്‍ നമ്മുക്ക് മുമ്പും തന്നിട്ടുണ്ട്. അതുകൊണ്ട് തന്നെയാണ് Nature-centered എന്ന രീതിയിലേക്ക് പരിസ്ഥിതിസംരക്ഷണം നീങ്ങുന്നത്.

    ഗുണമില്ല എന്ന് പറഞ്ഞാല്‍ മാത്രം പൊരല്ലോ. കടിക്കാതിരിക്കാനും Rabies വരാതിരിക്കാനും ഇവയുടെ എണ്ണം കുറക്കാനുമായി നമ്മുക്കിനി എന്ത് ചെയ്യാം എന്ന് കൂടി ആലോചിക്കണമല്ലോ, അവിടെയാണ് ABC-AR(Animal Birth Control/Anti Rabies) പ്രോഗ്രാമ്സും Neutering/Spayingഉം ഒക്കെ കടന്നു വരുന്നത് . അപ്പോള്‍ ഇത് എത്രത്തോളം പ്രായോഗികമാണ്. ചിലവ് എന്ത് വരും. ഇതിന്റെ പിന്നില്‍ എന്തെങ്കിലും അജണ്ട ഉണ്ടോ(Anti Rabies Vaccine മാഫിയ ഉള്‍പെട്ടിട്ടുണ്ട് എന്നോക്കെയാണ് ചിലരുടെ വാദം). അത് നമ്മുക്ക് പരിശോദിക്കുന്നതിന് മുമ്പ് തെരുവ് നായകളെ Invasive species ആയി കാണണം എന്ന വാദവുമായി ബന്ധപെട്ട ഒന്നു രണ്ട് കാര്യങ്ങള്‍ കൂടി കൂട്ടി ചേര്‍ക്കട്ടെ.

    തെരുവ് നായകളെ ഒരു invasive species പോലെ കണകാക്കാം എന്നുള്ള വാദം ശെരിയല്ല എന്നാണ് എന്റെ അഭിപ്രായം. Invasive species ആവണെങ്കില്‍ രണ്ട് ഗുണങ്ങളാണ് പ്രധാനമായി പറയുന്നത്. 1) പുതിയതായി വന്ന് ചേര്ന്നത് (Introduced Species) ആയിരിക്കണം. 2) അവ വലിയ തോതില്‍ പരിസ്ഥിതി പ്രശ്നം ഉണ്ടാക്കുന്നവ ആയിരിക്കണം. പട്ടിക്ക് ഈ രണ്ട് ഗുണവും ഇല്ല. പട്ടി ( Indian Pariah Dog) introduced species ആണ് എന്ന് പറഞ്ഞാല്‍ മനുഷ്യനും ഇന്ത്യയില്‍ introduced species ആണ് എന്ന് പറയണ്ടി വരും. പരിസ്ഥിതി പ്രശ്നം പട്ടി ഉണ്ടാക്കുന്നു എന്ന വാദവും നിലനില്കില്ല. ഗണ്യമായി കൂടുകയോ മറ്റ് speciesഉകളെ ഉന്മൂലനം ചെയ്യുകയോ പട്ടി ചെയുന്നില്ല. Resource റിച്ച് ആയ അവസ്ഥയില്‍ സാദാരണ ഏത് മൃഗത്തിനും വരാവുന്ന വളര്‍ച്ചയെ പട്ടിക്ക് വന്നിട്ടുള്ളു.

    ഇന്നി എന്താണ് ABC-AR. അത് മെച്ചപെട്ട രീതി ആകുന്നതെങ്ങനെ . അതിന് എന്ത് തെളിവ് . അതിപ്പോള്‍ നടക്കുന്ന അക്രമങ്ങള്‍ക്ക് പരിഹാരമാകുമോ എന്ന വിഷയത്തിലേക്ക് കടക്കാം.

    ReplyDelete
  3. Animal Birth Controll/Anti Rabies പ്രോഗ്രാമില്‍ പ്രധാനമായും ചെയ്യാവുന്നത് Neuteringഉം Spayingഉം ആണ്. ഞാന്‍ മനസിലാക്കിയത് വച്ച് പല രീതിയില്‍ ABC നടപ്പിലാക്കാം. താഴെ quote ചെയ്തിരിക്കുന്ന പേപ്പറില്‍ വളരെ ഡീറ്റേലായിട്ട് അവര്‍ ചെയ്ത കാര്യങ്ങള്‍, അവയുടെ success rate എല്ലാം പറയുന്നുണ്ട്. ഇതിനു സമാനമായ പല പഠനങ്ങളും നെറ്റില്‍ തപ്പിയാല്‍ കിട്ടും. ഇന്ത്യയില്‍ തന്നെയുള്ള രണ്ട് ആര്‍ട്ടികള്‍ ഞാന്‍ share ചെയ്യുന്നു. ചുരുക്കി പറഞ്ഞാല്‍ ABC പ്രോഗ്രാം efficient ആയി നടത്തിയ എല്ലാ സ്ഥലത്തും അത് വളരെ വിജയകരം ആയിരുന്നു. ഉദാഹരണത്തിന് Chennaiയില്‍ 2008ന് ശേഷം Rabies കേസുകള്‍ ഒന്നും തന്നെ ഉണ്ടായിട്ടില്ല. 8.75 deaths/year നടന്നുകൊണ്ടിരുന്ന Jaipurല്‍ 2001 ന് ശേഷം ഒറ്റ rabies cases ഉണ്ടായിട്ടില്ല എന്ന് മാത്രമല്ല പഠനകാലയളവില്‍ പട്ടികളുടെ എണ്ണത്തില്‍ 28% കുറവ് വന്നു. Bangaloreലും പട്ടിയുടെ കടി കിട്ടിയവരുടെയും rabies വന്നവരുടെയും എണ്ണം നല്ലഅളവില്‍ കുറഞ്ഞു.

    പട്ടികള്‍ കുറഞ്ഞതുകൊണ്ട് അവ കടിക്കകുന്നതിനെങ്ങനെ പരിഹാരം ആകും എന്ന ചോദ്യം വരാം. ABC-AR പ്രോഗ്രാം പട്ടികളുടെ എണ്ണം മാത്രമല്ല കുറക്കുന്നത്. പട്ടികളെ Neuter ചെയ്യുമ്പോള്‍ രണ്ട് ഗുണങ്ങള്‍ ഉണ്ടാകും. അവ പെറ്റു പെരുകില്ല മാത്രമല്ല ആണ്‍ പട്ടികളുടെ ഇടയല്‍ ഉണ്ടാകുന്ന അക്രമാസക്തി, sexual competitionഇല്‍ നിന്ന് ഉടലെടുക്കുന്നവ, കുറയും. അത് വഴി Dog Bites കുറയും. എത്ര പട്ടികളെ ABCയുടെ കീഴില്‍ കൊണ്ടുവരാന്‍ കഴിയും എന്നുള്ളതും അവ പെറ്റ് പെരുകാന്‍ ഉണ്ടാകുന്ന സാഹചര്യം എത്രത്തോളം ഇല്ലാതാക്കാന്‍ കഴിയും എന്നതുമാണ് ഇതിന്റെ success rate തീരുമാനിക്കുക. ഈ പ്രോഗ്രാമിനെ കുറിച്ച് കൂടുതല്‍ താഴെയുള്ള പേപ്പറില്‍ വായിക്കാം.

    ഇത് Anti Rabies Vaccine Maphiaയുടെ അജണ്ട ആണ് എന്നുള്ളതിനുള്ള മറുപടി : ABC-AR കൊണ്ടുവന്ന സ്ഥലങ്ങളിലെ data പരിശോദിക്കാം. പട്ടികളുടെ എണ്ണം ഗണ്യമായി കുറയുന്നു. Rabies കേസുകള്‍ ഒന്നു പോലും റിപ്പോര്‍ട്ട് ചെയ്യുന്നില്ല. പട്ടികള്‍ കടിക്കുന്നവരുടെയും എണ്ണം കുറയുന്നു. കൂടാതെ എത്ര പട്ടികള്‍ ഒരു സ്ഥലത്ത് ഉണ്ട് ഏതൊക്കെ പട്ടി Anti Rabies കുത്തിവൈപ്പ് എടുത്തതാണ് എന്ന കൃത്യമായ രേഖ അനാവശ്യമായ Anti Rabies കുത്തിവൈപ്പുകള്‍ ഒഴിവാക്കാന്‍ സഹായിക്കും. ഉദാഹരണത്തിന് USല്‍ റിപ്പോര്‍ട്ട് ചെയുന്ന കടികള്‍ ഇന്ത്യയുടെ പത്തിരട്ടിയാണെങ്കിലും PEP(post exposure Prophylaxis)എടുക്കുന്നവരുടെ എണ്ണം കുറവാണ്. കൊന്നുതള്ളിയിരുന്ന സ്ഥലങ്ങളിലേ എല്ലാം Rabies deathsന്റെ എണ്ണവും ഒര്‍മിച്ചാല്‍ നന്ന്.

    Government ഏറ്റെടുക്കന്നതിനെ കുറിച്ച് : ഇതിന് സമാനമായ പദ്ധതികള്‍ പലതും കൊണ്ടുവരാന്‍ നോക്കുകയും പരാജയപെടുകയും ചെയ്തതാണ്. നായ ഒരു ടെറിട്ടോറിയല്‍ ഡോഗ് ആണ്. അവയെ അവയുടെ niche/territorial zoneല്‍ നിന്ന് മാറ്റിയാല്‍ Inward migrationനു കാരണമാകുകയും അതുമായി ബന്ധപെട്ട റിസ്കുകള്‍ നമ്മള്‍ നേരിടേണ്ടിയും വരും. അതായത് പറഞ്ഞ് വന്നത്, തെരുവു നായകളെ പിടിച്ച് Govt വീട്ടില്‍ കൊണ്ടിട്ടാലും Meneka Gandhiയുടെയും മൃഗസ്നേഹികളുടെയും വീട്ടില്‍ കൊണ്ട് വിട്ടാലും പ്രശ്നം നാട്ടുകാര്‍ക്ക് തന്നെയാണ് ഉണ്ടാവുക. ഒരു മിനിമം പോപ്പുലേഷന്‍ അവിടെ നിലനിര്‍ത്തുകയും അവയെ വ്യക്തമായി ടാഗ് ചെയ്ത് Neuter ചെയ്ത് അവയുടെ വളര്‍ച്ചക്ക് സഹായിക്കുന്ന resourcesകുറച്ച് അവയുടെ എണ്ണം കുറക്കുകയാണ് ഇന്ന് നമ്മുക്ക് മുന്നില്‍ തെളിയിക്കപെട്ട ഏക വഴി എന്ന് ചുരുക്കം.

    ReplyDelete
  4. പിന്നെ മനുഷ്യനുള്ളതല്ലാത്തതിനെയെല്ലാം കൊല്ലുന്നതിനെ ഒരു ഗണത്തില്‍ പെടുത്താം എന്നു എനിക്കഭിപ്രായം ഇല്ല. പക്ഷെ അത് ഒരു വേറെ ടോപിക്കാണ്. ഈ വിഷയവുമായി വല്യ ബന്ധമില്ല. ആനിമല്‍ ക്രുവലിറ്റിക്കെതിരെയുള്ള നിയമം മാത്രമായിരുന്നു ഇതിനുള്ള തടസ്സമെങ്കില്‍ ശരിയാണ് അതും ചര്‍ച്ചചെയ്യപെടേണ്ടി വന്നേനെ. ഇത് അങ്ങനെ അല്ലാത്തതുകൊണ്ട് അതിലേക്ക് കടക്കുന്നില്ല.

    ഒന്നു രണ്ട് കാര്യങ്ങള്‍ കൂടി കൂട്ടചേര്‍ക്കുന്നു : നിലവിലുള്ള നിയമം Incurable ill (Rabies included) ആയ പട്ടികളേയും Mortally wounded ആയ പട്ടികളേയും കൊല്ലാന്‍ തന്നെയാണ് നിയമം പറയുന്നത്. മൃഗസ്നേഹം മൂത്ത് അവയെ ഒന്നും ചെയ്യരുത് എന്ന് ആരും പറയുന്നില്ല. ആകെ നിയമം പറയുന്ന മനുഷ്യത്തപരമായി അവയെ പിടികൂടി കൊല്ലണം എന്നുമാത്രമാണ്. അതുകൊണ്ട് ABC നടത്തുന്നവര്‍ എല്ലാം Rabies പട്ടികളുടെ കാര്യം ആണ് പറയുന്നതെന്ന് തെറ്റദ്ധരിക്കരുത്. മുകളില്‍ പറഞ്ഞകാര്യങ്ങള്‍ എല്ലാം സാദാരണ Stray Dogsന്റെ കാര്യം ആണ് പറയുന്നത്. ഇന്നി ഇത് longterm അല്ലേ ഉടനെ എന്ത് ചെയ്യാന്‍ പറ്റും എന്ന് ചോദിച്ചാല്‍ അതിനെനിക്ക് മറുപടി ഇല്ല. ഇത് വളരെ complex ആയ പ്രശ്നം തന്നെയാണ് . Waste dumpingഉം Inward Migrationഉം ഒക്കെ നിലനില്കുമ്പോള്‍ ഉടന്‍ ഫലം തരുന്ന ഒരു രീതി നമ്മുക്കിന്നില്ല. നിയമവിരുദ്ധമായി കൊന്നുതള്ളുന്നത് ഫലപ്രദം അല്ല എന്ന് പഠനങ്ങള്‍ കാണിക്കുകയും ABC-AR കൊണ്ടുവന്നു പ്രായോഗികമാക്കിയ (Inefficient and corrupt പ്രാക്ടിസസ് അതിലും നടക്കുന്നുണ്ട്) സ്ഥലങ്ങളില്‍ എല്ലാം മാറ്റം വന്നു എന്നതും ആണ് ഇന്ന് നമ്മുക്കു മുന്നിലുള്ള വസ്തുത. ABC മനുഷ്യതപരമായതുകൊണ്ടോ അവ രോക്ഷാകുലരായി നിക്കുന്നവര്‍ക്ക് തൃപ്തികരം ആകുന്നില്ല എന്നതുകൊണ്ടോ, അവ നമ്മുക്ക് ഉപേക്ഷിച്ച്, ഫലപ്രദം ആകില്ല എന്ന് പലവട്ടം തെളിയിച്ച ഒരു രീതി തെരഞ്ഞെടുക്കണോ ? ABCയിലും മികച്ച ഒരു രീതി പഠനങ്ങളുടെയും തെളിവുകളുടെയും സഹായത്തോടെ കൊണ്ടുവരികയാണെങ്കില്‍ അത് നമ്മുക്ക് ചര്‍ച്ചക്ക് വക്കാം.

    Help in Suffering,Jaipur : http://www.hsi.org/assets/…/eng_abc_animal_birth_control.pdf
    Has ABC been a success : http://tinyurl.com/nlngnz5
    All About ABC: http://www.awbi.org/awbi-pdf/SOP.pdf

    ReplyDelete
  5. Viyogippundu, vaishakhan....
    Manushyan valya oru sambavam onnum alla ennu thirich arivu ullappol, ollathil ettavum valya 'invasive species' manushyan thanne aanennulla tiricharivum koodi undaakanday.....

    Please think on it...

    ReplyDelete
  6. This may not be a problem bothering we humans, as long as the other animals do not have a developed brain as humans have. But remember that in humans itself there are different races, which are possibly tomorrows different species... What if the native Americans start thinking the same with the modern Americans.
    What i meant is that there is difference between a tiger killing a deer, we killing mosquitoes, and arguing to kill all stray dogs..
    The first two will come im the natures law (struggle for existence & survival of the fittest) and the last one similar to what hitler and many others did (and is even doing now in many parts of world)

    Its not these dogs but we humans are wrong.
    What is really needed is not killing or castrate these dogs, but to stop throwing waste in open places which served as food for them. Then they will go or decrease in number by its own..

    ReplyDelete