Mar 31, 2016

കേരളത്തെ ഗുജറാത്ത് പോലെ വികസിപ്പിക്കുമത്രേ!

മാനവ വികസന ഇൻഡക്സ്:
ഇൻഡ്യയുടെ ശരാശരി  - 0.609,
കേരളത്തിന്റേത് - 0.825,
ഗുജറാത്തിന്റേത് - 0.599 (https://en.wikipedia.org/wiki/List_of_Indian_states_and_territories_by_Human_Development_Index)

സാക്ഷരതാ നിരക്ക്:
ഇൻഡ്യയുടെ ശരാശരി - 74.04,
കേരളത്തിന്റേത് - 93.91,
ഗുജറാത്തിന്റേത് - 79.31 (https://en.wikipedia.org/wiki/Indian_states_ranking_by_literacy_rate)

ഒരു പൗരന്റെ ശരാശരി പ്രതീക്ഷിത ജീവിതദൈർഘ്യം:
ഇൻഡ്യയുടെ ശരാശരി  - 63.5 വയസ്സ്,
കേരളത്തിന്റേത് - 74 വയസ്സ്,
ഗുജറാത്തിന്റേത് - 64.1 വയസ്സ് (https://en.wikipedia.org/wiki/List_of_Indian_states_by_life_expectancy_at_birth)

ശിശുമരണ നിരക്ക് (ജനിക്കുന്ന ആയിരം കുട്ടികളിൽ എത്ര പേർ മരിക്കുന്നു):
ഇൻഡ്യയുടെ ശരാശരി  - 40,
കേരളത്തിന്റേത് - 12,
ഗുജറാത്തിന്റേത് - 36 (http://censusindia.gov.in/vital_statistics/SRS_Bulletins/SRS%20Bulletin%20-Sepetember%202014.pdf)

ലിംഗഅനുപാതം (ആയിരം പുരുഷൻമാർക്ക് എത്ര സ്ത്രീകൾ എന്ന കണക്ക്):
ഇൻഡ്യയുടെ ശരാശരി  - 919,
കേരളത്തിന്റേത് - 1084,
ഗുജറാത്തിന്റേത് - 918 (https://en.wikipedia.org/wiki/Indian_states_and_territories_ranking_by_sex_ratio)

ഇങ്ങനെ ഒരു സംസ്ഥാനത്തിരുന്നോണ്ട്, ഇവിടത്തെ സകല സൗകര്യങ്ങളും ആസ്വദിക്കുന്ന ഒരാള് ഒരു തെരെഞ്ഞെടുപ്പ് സീറ്റ് കിട്ടിയപ്പോ പറയുന്നു, കേരളത്തെ ഗുജറാത്ത് പോലെ വികസിപ്പിക്കുമെന്ന്. കൂടെ അതിന് ഹോയ് വിളിക്കാൻ കുറേ പേര് വേറെ. പ്രശ്നം വേറൊന്നുമല്ല, മേലെ രണ്ടാമത് പറഞ്ഞ ഐറ്റം - സാക്ഷരത - അളക്കുന്നതിലുള്ള പ്രശ്നമാണ്. അക്ഷരത്തെറ്റില്ലാതെ വഷളത്തരം എഴുതിപ്പിടിപ്പിക്കാനുള്ള കഴിവിനെയാണ് നമ്മളിന്ന് സാക്ഷരത എന്ന് വിളിക്കുന്നത്. അത് പതിയെപ്പതിയെ മറ്റ് ഐറ്റങ്ങളേയും ബാധിയ്ക്കും. അന്ന് മിക്കവാറും ടി യുവനേതാവിന് സീറ്റ് ഉറപ്പിക്കാം. തത്കാലം സമയമായിട്ടില്ല.

എന്തായാലും, പോകുന്ന പോക്കിന് ഈ വിക്കിപ്പീഡിയ ലേഖനം കൂടി ഒന്ന് കണ്ടേക്കുക. ഐക്യരാഷ്ട്രസഭയുടെ ശ്രദ്ധ പിടിച്ചുപറ്റിക്കൊണ്ട്, മറ്റ് വികസിതരാജ്യങ്ങളോട് കിടപിടിക്കുന്ന സാമൂഹ്യസാഹചര്യങ്ങൾ പ്രദർശിപ്പിക്കുന്ന, ഒരു മൂന്നാം ലോകരാജ്യത്തെ ഒരു കൊച്ചുസംസ്ഥാനത്തെ പറ്റിയുള്ളതാണ്. അതിനെ 'കേരളാ മോഡൽ' എന്ന് വിശേഷിപ്പിക്കപ്പെടുന്നു. https://en.wikipedia.org/wiki/Kerala_model

പേടിക്കണ്ടാ കേരളാ മോഡൽ സാധിച്ചെടുക്കാൻ സഹായിച്ച ഘടകങ്ങൾ പരിഗണിക്കുമ്പോൾ ഇത് വെറും ചരിത്രം മാത്രമാണ്. വർത്തമാനത്തിൽ കേരളം അതിന്റെ രൂപം പോലെ തന്നെ പടവലങ്ങാ മോഡൽ കീഴോട്ടുള്ള വളർച്ചയാണ് കാണിക്കുന്നത്.




Mar 21, 2016

എന്റെ ഗാരേജിലെ ഡ്രാഗൺ!

ഞാൻ പറയുന്നു, "എന്റെ ഗാരേജിൽ തീ തുപ്പുന്നൊരു ഡ്രാഗൺ ഉണ്ട്."

ഞാനിത് ഗൗരവമായി പറഞ്ഞാൽ, എന്തോ തമാശ വരാൻ പോകുന്നു, എന്റെ തലയ്ക്കെന്തോ കുഴപ്പമുണ്ട് എന്നിങ്ങനെ പല കാര്യങ്ങളും നിങ്ങളുടെ മനസിൽ തോന്നിയേക്കാം; ശരിയ്ക്കും അങ്ങനൊരു ഡ്രാഗൺ എന്റെ ഗാരേജിലുണ്ട് എന്നൊഴികെ.

പക്ഷേ ഞാൻ വിടാനുദ്ദേശിക്കുന്നില്ല. നിങ്ങളുടെ പക്കൽ ഒഴിവുസമയം ഉണ്ടെങ്കിൽ, എന്നാപ്പിന്നെ ആ ഡ്രാഗണിനെ നേരിട്ട് കണ്ടിട്ട് തന്നെ കാര്യം എന്ന് ഒരു വെല്ലുവിളി പോലെ നിങ്ങൾ തീരുമാനിച്ചേക്കാം.

നിങ്ങളെ ഞാനെന്റെ ഗാരേജിലേയ്ക്ക് കൂട്ടിക്കൊണ്ട് പോകുന്നു. നിങ്ങൾ ലേശം ചുച്ഛത്തോടെ പിറകേ വരുന്നു.

ഞാൻ വാതിൽ തുറക്കുന്നു. അവിടെ ഒരു ഏണി ചാരി വച്ചിട്ടുണ്ട്, കുറേ പഴയ പെയിന്റ് പാട്ട കിടപ്പുണ്ട്, ഒരു സൈക്കിളുമുണ്ട്. ഡ്രാഗൺ മാത്രമില്ല.

"ഡ്രാഗണെവിടെ?" നിങ്ങൾ ചോദിക്കുന്നു.

"ദാ ഇവിടുണ്ടല്ലോ അത്" ഞാൻ കൈചൂണ്ടി, "ഓഹ്, അത് അദൃശ്യനായ ഒരു ഡ്രാഗണാണെന്ന് പറയാൻ ഞാൻ വിട്ടുപോയി"

നിങ്ങൾ അല്പം ക്ഷമയും വിവരവുമുള്ള ആളാണ്. ഇത് കേട്ടയുടൻ എന്നെ തല്ലാനൊരുങ്ങുന്നില്ല. പകരം വേറൊരു ഐഡിയ മുന്നോട്ട് വെക്കുന്നു,

"നിങ്ങളൊരു കാര്യം ചെയ്യൂ, ഈ തറയിൽ കുറച്ച് അരിപ്പൊടിയോ മണലോ വിതറൂ. ഡ്രാഗൺ നടക്കുമ്പോൾ അതിന്റെ കാല്പാട് കാണാമല്ലോ"

"ഗുഡ് ഐഡിയ! പക്ഷേ ഒരു കുഴപ്പമുണ്ട്. എന്റെ ഡ്രാഗൺ കാൽ തറയിൽ തൊടാതെയാണ് നടക്കുന്നത്!"

നിങ്ങൾ ചില്ലറക്കാരല്ല. എന്നെയങ്ങനെ വിടാനുദ്ദേശിക്കുന്നില്ല. "അങ്ങനെയെങ്കിൽ നമുക്കൊരു ഇൻഫ്രാ റെഡ് സെൻസർ കൊണ്ടുവരാം. തീതുപ്പുന്ന ഡ്രാഗണായതുകൊണ്ട് അതിന്റെ തെർമൽ ഇമേജ് എടുക്കാമല്ലോ"

"അയ്യോ, ഈ ഡ്രാഗൺ ചൂടില്ലാത്ത തീയാണ് തുപ്പുന്നത്!" ഞാനും വിടുന്നില്ല.

"എന്നാലല്പം പെയിന്റെടുത്ത് ഡ്രാഗണിന്റെ നേർക്ക് സ്പ്രേ ചെയ്യാം. അപ്പോ അതിന്റെ രൂപം തെളിഞ്ഞ് വരുമല്ലോ"

"ശ്ശോ! എന്റെ ഡ്രാഗൺ സാദാ പദാർത്ഥം കൊണ്ട് നിർമിക്കപ്പെട്ടിരുന്നു എങ്കിൽ എത്ര നന്നായേനെ. ഇതിപ്പോ, അതിന്റെ ദേഹത്ത് പെയിന്റ് പിടിക്കില്ല"

ഇനിയും നിങ്ങളുടെ ബുദ്ധിയിൽ തോന്നുന്ന മാർഗങ്ങളൊക്കെ നിങ്ങൾ മുന്നോട്ട് വെച്ചേക്കാം. അപ്പോഴെല്ലാം, എന്തുകൊണ്ട് ആ മാർഗം ഉപയോഗിക്കാനാവില്ല എന്ന് വിശദീകരിക്കുന്ന ഒരു ഗുണം കൂടി ഞാൻ എന്റെ ഡ്രാഗണിന് ചേർത്തുകൊടുക്കുന്നു.

ഇനിയാണ് കാതലായ ചോദ്യം, എന്റെ ഡ്രാഗണിനെ നിങ്ങൾക്ക് ഒരുരീതിയിലും സെൻസ് ചെയ്യാനാകുന്നില്ല. പക്ഷേ അങ്ങനൊരു ഡ്രാഗൺ ഇല്ലാന്ന് ഒരിയ്ക്കലും നിങ്ങൾക്ക്
തെളിയിക്കാനും ആകില്ല. അതിന്റെ അർത്ഥം അങ്ങനൊരു ഡ്രാഗൺ ഉണ്ടെന്നാണോ? ഞാൻ പറയുന്നത് തെറ്റാണെന്ന് തെളിയിക്കാൻ നിങ്ങൾക്ക് കഴിയുന്നില്ല എന്നതുകൊണ്ട് ഞാൻ പറയുന്നത് ശരിയാകുമോ?

അതൊക്കെ പോട്ടെ. കാണാനാകാത്ത, തറയിൽ തൊടാതെ പൊന്തി നിൽക്കുന്ന, പെയിന്റ് പറ്റാത്ത, ചൂടില്ലാത്ത തീ തുപ്പുന്ന ഒരു ഡ്രാഗൺ ഉള്ളതും, അങ്ങനൊരു ഡ്രാഗൺ ഇല്ലാത്തതും തമ്മിൽ എന്താണ് വ്യത്യാസം? അല്ലാ, വല്ല വ്യത്യാസവുമുണ്ടോ?

ഇത്തരം ഡ്രാഗണുകളെക്കുറിച്ച് നിങ്ങൾ ജീവിതത്തിൽ സ്ഥിരം കേൾക്കുന്നുണ്ട്. ദൈവം, പ്രേതം, ആത്മാവ് തുടങ്ങി പല പല പേരുകളിലായിരിക്കും എന്ന് മാത്രം.

(കാൾ സെയ്ഗന്റെ "The Dragon in my Garage"-നോട് കടപ്പാട്)

Mar 15, 2016

ഡേറ്റാ കേബിളിലെ വീർത്ത സാധനം!

ചിത്രത്തിൽ കാണുന്നത് വളരെ സുപരിചിതമായ ഒരു സാധനമാണ്- ഡേറ്റാ കേബിൾ. നിങ്ങളിത് വായിക്കുന്നത് ഒരു കമ്പ്യൂട്ടറിലാണ്. അങ്ങനെയൊരാൾക്ക് ഡേറ്റാ കേബിൾ എന്തിനുള്ളതാണെന്ന് പറഞ്ഞുകൊടുക്കേണ്ട കാര്യമുണ്ടാവില്ല. ചോദ്യം വേറൊന്നാണ്. ചിത്രത്തിൽ ചുവന്ന വട്ടത്തിൽ അടയാളപ്പെടുത്തിയിരിക്കുന്ന ഒരു വീർത്ത സാധനം ആ കേബിളിൽ കാണാം. എന്താണത്? വെറുതേ ഭംഗിയ്ക്ക് വെച്ചേക്കുന്നതാണോ? ഡേറ്റാ കേബിളിൽ മാത്രമല്ല, കമ്പ്യൂട്ടറിന്റെ പവർ കേബിളിലുൾപ്പടെ പലയിടത്തും ഇതുപോലൊരു സാധനം കണ്ടിട്ടുണ്ടാകും.

അതിന്റെ പേര് ഫെറൈറ്റ് ബീഡ് (ferrite bead) എന്നാണ്. കേബിളിനെ അല്ലെങ്കിൽ അത് ഘടിപ്പിക്കുന്ന ഉപകരണത്തെ ഒരു ആന്റിനയാകാതെ തടഞ്ഞ് നിർത്തുകയാണ് അതിന്റെ പണി!

ആന്റിന എന്താണെന്നറിയാമല്ലോ. വൈദ്യുതകാന്തിക തരംഗങ്ങളെ, പ്രത്യേകിച്ച് റേഡിയോ തരംഗങ്ങളെ സ്വീകരിക്കാനോ പ്രക്ഷേപണം ചെയ്യാനോ ഉള്ള ഉപകരണം. വീട്ടിലെ ആന്റിന സ്വീകരിക്കാനും (receiving antenna) റേഡിയോ നിലയത്തിലെ ആന്റിന അതിനെ പ്രക്ഷേപണം ചെയ്യാനും (transmitting antenna) ഉപയോഗിക്കുന്നു. എങ്ങനെയാണ് ഇവ പ്രവർത്തിക്കുന്നത്. മാറിക്കൊണ്ടിരിക്കുന്ന ഇലക്ട്രിക് ഫീൽഡ് ഒരു മാഗ്നറ്റിക് ഫീൽഡിനും, മാറിക്കൊണ്ടിരിക്കുന്ന മാഗ്നറ്റിക് ഫീൽഡ് ഒരു ഇലക്ട്രിക് ഫീൽഡിനും രൂപം കൊടുക്കും. അങ്ങനെയെങ്കിൽ ഒരു വയറിലൂടെ കറന്റ് പ്രവഹിച്ചാൽ, അതിൽ ക്രമമായ ഏറ്റക്കുറച്ചിലുകൾ ഉണ്ടായാൽ, ആരും പറയാതെ തന്നെ അവിടെ പരസ്പരധാരണയോടെ മാറിക്കൊണ്ടിരിക്കുന്ന ഒരു വൈദ്യുതകാന്തികക്ഷേത്രം ഉണ്ടാകുകയും, അതൊരു തരംഗമായി -റേഡിയേഷൻ ആയി- പുറത്തേയ്ക്ക് പ്രവഹിക്കുകയും ചെയ്യും. മറിച്ച് ഇത്തരമൊരു റേഡിയേഷൻ ഒരു വൈദ്യുതക്കമ്പിയെ തൊട്ടുരുമ്മി കടന്നുപോയാൽ അതിനനുസൃതമായ ഒരു കറന്റ് അതിലുണ്ടാക്കുകയും ചെയ്യും. പ്രക്ഷേപണം ചെയ്യുന്ന ആന്റിനയും സ്വീകരിക്കുന്ന ആന്റിനയും യഥാക്രമം ഈ രണ്ട് പ്രതിഭാസങ്ങളാണ് ഉപയോഗപ്പെടുത്തുന്നത്.

നമ്മുടെ വീട്ടിൽ കിട്ടുന്ന കറന്റിന് വിളിക്കുന്ന പേര് ശ്രദ്ധിച്ചിട്ടുണ്ടാകുമല്ലോ, ഏ.സി. കറന്റ് എന്നാണ്. Alternating Current എന്നതിന്റെ ചുരുക്കരൂപമാണ് ഏ.സി. (ac current എന്ന് പറയുമ്പോൾ alternating current current എന്ന വശപ്പെശക് രൂപത്തിലാണ് നമ്മൾ പറയുന്നത് എങ്കിലും, അതൊരു അംഗീകൃത കീഴ‍്‍വഴക്കമാണ്) അതായത് നമുക്ക് കിട്ടുന്ന കറന്റ് തന്നെ മാറിക്കൊണ്ടിരിക്കുന്ന ഒന്നാണ് (alternating). പക്ഷേ 50 Hz എന്ന ചെറിയ ഫ്രീക്വൻസിയിലാണ് അത് വരുന്നത് എന്നതുകൊണ്ട് കാര്യമായ റേഡിയേഷൻ പ്രശ്നം അതുണ്ടാക്കില്ല. പക്ഷേ ഉപകരണങ്ങൾ കറന്റിനെ പല രീതിയിൽ മാറ്റിമറിച്ചാണ് ഉപയോഗിക്കുന്നത്. കമ്പ്യൂട്ടർ, റേഡിയോ തുടങ്ങിയ ഉപകരണങ്ങൾ അവയ്ക്കുള്ളിൽ ഫ്രീക്വൻസി കൂടിയ കറന്റുകൾ ഉപയോഗിക്കുന്നുണ്ട്. ഇത് അവയെ 'മനപ്പൂർവ'മല്ലാതെ റേഡിയേഷൻ പുറത്തുവിടാൻ പ്രേരിപ്പിക്കുന്നു. unintentional radiator എന്നാണ് ഇവയെ സാങ്കേതികമായി വിളിക്കുക. ഇങ്ങനെ പുറത്ത് പോകുന്ന റേഡിയേഷൻ മറ്റ് ഉപകരണങ്ങളുടെ ഘടകഭാഗങ്ങളെ ഒരു receiving antenna-യെപ്പോലെ കണക്കാക്കി അവിടെച്ചെന്ന് അനാവശ്യമായ കറന്റ് ഉണ്ടാക്കും. Electromagnetic interference (EMI) എന്ന് വിളിക്കുന്ന ഈ പ്രതിഭാസം ഒരു ശല്യമാണ്. പഴയ ടീവി സെറ്റുകളിൽ കാണപ്പെട്ടിരുന്ന 'കുരുകുരുപ്പ്' (grains) ഇത്തരം EMI-യുടെ ഫലമാണ്. ടീവിയ്ക്ക് അടുത്തുവച്ച് ബൈക്ക് സ്റ്റാർട്ട് ചെയ്യുക, മോട്ടോർ പ്രവർത്തിപ്പിക്കുക തുടങ്ങിയവയൊക്കെ ഉണ്ടായാൽ സ്ക്രീനിൽ കുരുകുരുപ്പ് പ്രത്യക്ഷപ്പെടുമായിരുന്നു. ഇന്നത്തെ ടീവികൾ ഇതൊക്കെ പരിഹരിക്കുന്നതിനുള്ള സാങ്കേതികവിദ്യകളോടെയാണ് പ്രവർത്തിക്കുന്നത്. പക്ഷേ വളരെ ചെറിയ കറന്റുകൾ കൈകാര്യം ചെയ്യുന്ന വൈദ്യുതോപകരണങ്ങളിൽ ഇപ്പോഴും EMI പ്രശ്നമുണ്ടാക്കും. ഡേറ്റാ കേബിളുകൾ, വൈദ്യശാസ്ത്രരംഗത്ത് ഉപയോഗിക്കുന്ന സെൻസിറ്റിവായ ഉപകരണങ്ങൾ ഇവയൊക്കെ EMI-യിൽ നിന്നും സംരക്ഷിക്കേണ്ടത് ആവശ്യമാണ്.

ആ പണിയാണ് ഫെറൈറ്റ് ബീഡുകൾ ചെയ്യുന്നത്. കാന്തികസ്വഭാവമുള്ള ഫെറൈറ്റ് എന്നൊരു വസ്തു കൊണ്ടാണ് ഇതുണ്ടാക്കുന്നത്. അവ പ്രക്ഷേപണം ചെയ്യപ്പെടാനോ സ്വീകരിക്കപ്പെടാനോ സാധ്യതയുള്ള ഫ്രീക്വൻസി കൂടിയ ഏ.സി. കറന്റിനെ തടയുകയും ഫ്രീക്വൻസി കുറഞ്ഞവയെ മാത്രം കടത്തിവിടുകയും ചെയ്യും. സാങ്കേതിക ഭാഷയിൽ ഇതിനെ low-pass filtering എന്നുവിളിക്കുന്നു. ആ പ്രവർത്തനം ഇത്തിരി കൂടുതൽ ടെക്നിക്കലായതിനാൽ തത്കാലം അതിനെക്കുറിച്ച് വേവലാതിപ്പെടേണ്ടതില്ല.  എന്തായാലും അടുത്ത തവണ ഇത് കാണുമ്പോൾ സംഗതി വെറും ലുക്കിന് വെച്ചേക്കുന്നതല്ല എന്നോർക്കുമല്ലോ. 

Mar 13, 2016

കേരളത്തിൽ മരുന്ന് മാഫിയ: ഞെട്ടിക്കുന്ന വിവരങ്ങൾ പുറത്ത്

അന്താരാഷ്ട്രതലത്തിൽ പ്രവർത്തിക്കുന്ന മരുന്നുമാഫിയാ കമ്പനിയുടെ കേരളത്തിലെ ഇടപെടലുകളെക്കുറിച്ച് ഞെട്ടിക്കുന്ന വിവരങ്ങൾ പുറത്ത്. കഴിഞ്ഞ കുറേ വർഷങ്ങളായി കേരളത്തിലെ ആരോഗ്യരംഗത്ത് പരക്കെ സ്വാധീനം ചെലുത്തിയ, കോടികളുടെ ബിസിനസ് താത്പര്യം കൈയാളുന്ന കമ്പനിയുടെ ആസ്ഥാനം അമേരിക്കയാണെന്നാണ് വിവരം.

പെട്ടെന്ന് സംശയം തോന്നിക്കാത്ത വിധം അതിവിദഗ്ദ്ധമായി പ്ലാൻ ചെയ്തതാണ് ഈ നെറ്റ്‍വർക്കിന്റെ പ്രവർത്തനരീതി. ഇതിന്റെ ഏറ്റവും കൗതുകകരമായ ഭാഗം മോഡേൺ മെഡിസിനെതിരേ പ്രവർത്തിക്കുന്ന സന്നദ്ധസംഘടനകളിലൂടെയാണ് കമ്പനി അതിന്റെ പദ്ധതികൾ നടത്തിയെടുക്കുന്നത് എന്നതാണ്. പ്രധാനമായും വാക്സിൻ വിരുദ്ധപ്രചരണങ്ങൾക്കാണ് ഇവർ ഊന്നൽ കൊടുക്കുന്നത്. ജനം വാക്സിൻ ഉപയോഗിക്കാതെ വരുമ്പോൾ പതിയെപ്പതിയെ മാരകരോഗങ്ങൾ പടർന്നുപിടിക്കുകയും ആ സമയത്ത് ആയിരക്കണക്കിന് കോടി രൂപയുടെ മരുന്നുകൾ വിറ്റഴിക്കുകയും ചെയ്യുകയാണ് പ്രധാന അജണ്ടയത്രേ. പകർച്ചവ്യാധികൾ പൊട്ടിപ്പുറപ്പെടുമ്പോൾ എന്ത് വിലകൊടുത്തും അവയ്ക്കുള്ള മരുന്നുകൾ വാങ്ങാൻ സർക്കാരുകൾ നിർബന്ധിതരാകുമെന്ന് അവർ കണക്കുകൂട്ടുന്നു. അമേരിക്കയിൽ വാക്സിൻ വിരുദ്ധരുടെ സഹായത്തോടെ മീസിൽസ് രോഗം തിരിച്ചുകൊണ്ടുവന്നപ്പോൾ കോടിക്കണക്കിന് ഡോളർ ലാഭമുണ്ടാക്കിയ കമ്പനി ഈ തന്ത്രം മൂന്നാംലോക രാജ്യങ്ങളിൽ കൂടി വ്യാപിപ്പിക്കാൻ തീരുമാനിക്കുകയായിരുന്നു എന്നാണറിവ്. ലാഭം കുറവായതിനാൽ പലപ്പോഴും മരുന്നുകമ്പനികൾ വാക്സിനുകൾ ഉണ്ടാക്കുന്നതിൽ താത്പര്യം കാണിക്കാറില്ല. പലപ്പോഴും സർക്കാർ തലത്തിലുള്ള സമ്മർദ്ദം കാരണമാണ് കമ്പനികൾ വാക്സിനുകൾ ഉണ്ടാക്കുന്നത്. മറിച്ച് വാക്സിന്റെ അഭാവത്തിൽ വരാവുന്ന രോഗങ്ങൾ ചികിത്സിക്കാനുപയോഗിക്കുന്ന മരുന്നുകൾ വിലകൂടിയവയും അതുകൊണ്ട് തന്നെ കൂടുതൽ ലാഭകരവുമാണ്. രോഗികൾ അടിയന്തിരഘട്ടത്തിൽ സർക്കാർ വഴിയല്ലാതെ സ്വകാര്യ ആശുപത്രി-മെഡിക്കൽ സ്റ്റോറുകൾ വഴി മരുന്ന് വാങ്ങാനും സാധ്യത കൂടുതലായതിനാൽ ആ വകയിലും മരുന്ന് കമ്പനികൾ വൻ ലാഭം ലക്ഷ്യമിടുന്നുണ്ട്. ഈ തിരിച്ചറിവാണ് വാക്സിൻവിരുദ്ധരെ ഈ സംരംഭത്തിൽ പങ്കാളികളാക്കാൻ കാരണം. കോടിക്കണക്കിന് രൂപയാണത്രേ ഈ വകയിൽ കേരളത്തിലെ ചില വാക്സിൻവിരുദ്ധ സംഘടനകൾക്ക് അമേരിക്കയിൽ നിന്ന് ലഭിയ്ക്കന്നത്.

ഈ വിവരം എത്രയും പെട്ടെന്ന് വാട്സാപ്പ് വഴിയോ ഫെയ്സ്ബുക്ക് വഴിയോ ഷെയർ ചെയ്ത് പ്രിയപ്പെട്ടവരുടെ ജീവിതം രക്ഷിക്കണേ കൂട്ടുകാരേ എന്ന് നാസ അഭ്യർത്ഥിച്ചിട്ടുണ്ട്.

Mar 9, 2016

സൂര്യഗ്രഹണവും അൾട്രാവയലറ്റും

സൂര്യഗ്രഹണസമയത്ത് അൾട്രാവയലറ്റ് രശ്മി വന്നുവീണ് വിഗ്രഹത്തിന് ചൈതന്യലോപം വരുമെന്നതിനാൽ ക്ഷേത്രം അടച്ചിടുമെന്നൊരു വാർത്ത കണ്ടായിരുന്നു. എന്തായാലും കുമ്പിടുന്ന മൂർത്തിയെക്കാൾ സ്ട്രോങ്ങാണ് അൾട്രാവയലറ്റ് എന്നതിനാൽ നാട്ടുകാര് ഇനിമുതൽ അൾട്രായവയലറ്റ് മൂർത്തിയെ കുടിയിരുത്തി പൂജ തുടങ്ങുമോ എന്നൊരു സംശയം ഉദിക്കുന്നുണ്ട്. അതെന്തായാലും എന്നെ ബാധിക്കുന്ന പ്രശ്നമല്ലാത്തതിനാൽ അതൊക്കെ വിശ്വാസികൾക്ക് വിട്ടുകൊടുത്ത് സൂര്യഗ്രഹണ-അൾട്രാവയലറ്റ് വിവാദത്തെ പറ്റി രണ്ട് വാക്ക്.

സൂര്യൻ ഒരു ഭയങ്കര സംഭവമാണ്. ഈ ഭൂമിയിലെ ആണവോർജം ഒഴികെ ബാക്കിയെല്ലാ ഊർജരൂപങ്ങളും സൂര്യനിൽ നിന്ന് വരുന്ന വെറും സൂര്യപ്രകാശത്തിൽ നിന്ന് ഉണ്ടാകുന്നതാണ്. പണ്ടുകാലത്ത് സൂര്യപ്രകാശം കൊണ്ട് ആഹാരമുണ്ടാക്കി ചത്തടിഞ്ഞ് ഫോസിലായി മാറിയ ചെടികളാണ് പെട്രോളും ഡീസലുമൊക്കെ ആകുന്നത്. നമ്മൾ കഴിക്കുന്ന വെജിറ്റേറിയൻ ആഹാരമെല്ലാം ഇന്നത്തെ സസ്യങ്ങൾ സൂര്യപ്രകാശം ഉപയോഗിച്ച് ഉണ്ടാക്കിയതാണ്. നോൺ-വെജ് ആണെങ്കിൽ മറ്റ് സസ്യങ്ങളെ ഭക്ഷിക്കുന്ന വെജിറ്റേറിയൻസിൽ  നിന്ന് ഉണ്ടാക്കിയതാണ്. അതായത് സൂര്യനാണ് നമ്മുടെ ആത്യന്തികമായ ഊർജസ്രോതസ്സ്. സൂര്യനിലെ ഈ ഊർജം ഉണ്ടാകുന്നത് ന്യൂക്ലിയർ ഫ്യൂഷൻ എന്ന ആണവപ്രവർത്തനം വഴിയാണ്. അങ്ങനെ ഉണ്ടാകുന്ന ഊർജം പ്രകാശരൂപത്തിൽ ഇങ്ങോട്ട് കയറ്റി അയയ്ക്കുന്നു. പ്രകാശം എന്ന് പറഞ്ഞാൽ ഫിസിക്സിന്റെ ഭാഷയിൽ വൈദ്യുതകാന്തിക വികിരണം ആണ്. വികിരണം എന്നാൽ ഇംഗ്ലീഷിൽ റേഡിയേഷൻ! അതെ, സൂര്യപ്രകാശം അഥവാ വെയിൽ നല്ല അസ്സലൊരു റേഡിയേഷനാണ്.

ഇത്രേം ക്ലിയറാണല്ലോ?

റേഡിയേഷൻ അഥവാ വികിരണത്തിന്റെ സ്വഭാവം ഇരിക്കുന്നത് അതിന്റെ തരംഗദൈർഘ്യം എത്രത്തോളമുണ്ട് എന്നതിനെ ആശ്രയിച്ചാണ്. 0.00000000000001 മീറ്റർ (ഒരു ആറ്റം ന്യൂക്ലിയസ്സിന്റെ വീതിയോളം) മാത്രം തരംഗദൈർഘ്യമുള്ള ഗാമാ റേഡിയേഷൻ മുതൽ കിലോമീറ്ററുകൾ വരെ തരംഗദൈർഘ്യമുള്ള റേഡിയോ വികിരണം വരെയുണ്ട്. ഈ പേരുകളൊക്കെ ചരിത്രപരമായി ഉണ്ടായതാണ്. ഗാമായും അൾട്രാവയലറ്റും കണ്ണിൽ കാണുന്ന പ്രകാശവും ഒക്കെ വേറേ വേറെ സംഗതികളാണെന്ന് കരുതിയിരുന്ന കാലത്ത് അവയ്ക്ക് വേറെ വേറെ പേരുകളിട്ടു. പിന്നീട് ഇവയെല്ലാം അടിസ്ഥാനപരമായി പല തരംഗദൈർഘ്യങ്ങൾ ഉള്ള ഇലക്ട്രോമാഗ്നറ്റിക് തരംഗങ്ങൾ മാത്രമാണെന്ന് മനസിലാക്കിയപ്പോഴും തിരിച്ചറിയാനുള്ള എളുപ്പത്തിന് പഴയ പേര് തുടർന്നുവെന്നേയുള്ളൂ.

ഇലക്ട്രോമാഗ്നറ്റിക് തരംഗങ്ങളിൽ (EM തരംഗങ്ങൾ) ഏതാണ്ട് 380 നാനോമീറ്റർ മുതൽ 760 നാനോമീറ്റർ വരെ തരംഗദൈർഘ്യം ഉള്ളവയ്ക്ക് ഒരു പ്രത്യേകതയുണ്ട്. അവ മനുഷ്യന്റെ കണ്ണുകളിലെ സവിശേഷതരം കോശങ്ങളിൽ കാണപ്പെടുന്ന റെറ്റിനൽ എന്ന പ്രോട്ടീനിനെ ഉത്തേജിപ്പിയ്ക്കും. ഈ ഉത്തേജനം ഒരു വൈദ്യുതസിഗ്നൽ ആയി തലച്ചോറിലേയ്ക്ക് പോകും. ഈ സിഗ്നലിനെ തലച്ചോർ എങ്ങനെ മനസിലാക്കുന്നോ അതാണ് 'കാഴ്ച' എന്ന പ്രതിഭാസം. അതുകൊണ്ട് തന്നെ 380-760 എന്ന റെയ്ഞ്ചിലുള്ള EM തരംഗങ്ങളെ നമ്മൾ ദൃശ്യപ്രകാശം എന്ന് വിളിക്കുന്നു. ഈ തരംഗദൈർഘ്യ റെയ്ഞ്ച് ഏകദേശമായി പറയുന്നതാണ്. പലയിടത്തും നേരിയ വ്യത്യാസമുള്ള സംഖ്യകൾ കണ്ടേക്കാം. തരംഗദൈർഘ്യം കൂടുന്തോറും ഒരു വികിരണം വഹിക്കുന്ന ഊർജം കുറയും. 760-ൽ കൂടുതൽ തരംഗദൈർഘ്യമുള്ള EM തരംഗങ്ങൾക്ക് റെറ്റിനലിനെ ഉത്തേജിപ്പിക്കാൻ മാത്രമുള്ള ഊർജമുണ്ടാവില്ല എന്നതിനാൽ കണ്ണിൽ അത് സവിശേഷമായ മാറ്റമൊന്നും ഉണ്ടാക്കില്ല. അതുകൊണ്ട് തന്നെ 760 nm-ന് മുകളിലുള്ള  ഇൻഫ്രാറെഡ് കിരണങ്ങൾ നമുക്ക് അദൃശ്യമാണ്. ഇനി 380-ൽ താഴെയുള്ള വികിരണങ്ങളാണ് അൾട്രാവയലറ്റ് (UV). അവയ്ക്ക് തീർച്ചയായും ദൃശ്യപ്രകാശത്തെക്കാൾ ഊർജം കൂടുതലാണ്. അവ റെറ്റിനാ കോശങ്ങളെ ഉദ്ദീപിപ്പിക്കുന്നതിന് പകരം നശിപ്പിക്കാനുള്ള പ്രവണതയാണ് കാണിക്കുന്നത്. അതുകൊണ്ട് UV-കിരണങ്ങൾ കണ്ണുകൾക്ക് ഹാനികരമാണ്. UV വികിരണങ്ങൾ തന്നെ തരംഗദൈർഘ്യം കുറയുന്ന ക്രമത്തിൽ UVA, UVB, UBC എന്നിങ്ങനെ മൂന്നായി തരംതിരിക്കപ്പെട്ടിട്ടുണ്ട്. UVA കൂട്ടത്തിൽ ഏറ്റവും തരംഗദൈർഘ്യം കൂടിയതും (ദൃശ്യപ്രകാശത്തോട് അടുത്ത് നിൽക്കുന്നു) UVC ഏറ്റവും കുറഞ്ഞതുമാണ്. ഇതിൽ UVA-യ്ക്ക് റെറ്റിനയെ ഉത്തേജിപ്പിക്കാനുള്ള കഴിവ് ഉണ്ടെങ്കിലും നമ്മുടെ കണ്ണിലെ ലെൻസ്, മുൻഭാഗത്തെ ആവരണമായ കോർണിയ എന്നിവ UVA-യെ നല്ല രീതിയിൽ ആഗിരണം ചെയ്യുന്നതിനാൽ അത് തടയപ്പെടുന്നു. ലെൻസ് ഇല്ലാത്ത രോഗാവസ്ഥ (Aphakia) ഉള്ളവർക്ക് UVA-യെ നേരിയ നീലനിറത്തിൽ തിരിച്ചറിയാൻ സാധിയ്ക്കും.

ഇനി സൂര്യപ്രകാശത്തിലേയ്ക്ക്. സൂര്യൻ ഒട്ടുമിക്ക തരംഗദൈർഘ്യത്തിലുമുള്ള പ്രകാശം ഉണ്ടാക്കുന്നുണ്ട്. പക്ഷേ ഗാമാ വികിരണങ്ങൾ മിക്കതും സൂര്യന്റെ ഉള്ളിൽ വച്ച് തന്നെ തരംഗദൈർഘ്യം കൂടിയ (ഊർജം കുറഞ്ഞ) വികിരണങ്ങളായി മാറ്റപ്പെടുന്നതിനാൽ സാധാരണഗതിയിൽ അത് സൂര്യനിൽ നിന്ന് പുറത്തുവരുന്നില്ല. മറിച്ച് എക്സ്-റേകൾ, അൾട്രാവയലറ്റ് എന്നിങ്ങനെ റേഡിയോതരംഗങ്ങൾ വരെ സൂര്യനിൽ നിന്ന് വരുന്നുണ്ട്, വ്യത്യസ്ത അളവുകളിലാണെന്ന് മാത്രം. ഭൂമിയിലേയ്ക്കുള്ള സൂര്യന്റെ റേഡിയേഷൻ സപ്ലൈയെ കുറിച്ച് പറയുമ്പോൾ രണ്ട് സ്ഥലങ്ങളിൽ വേവ്വേറെയാണ് പറയുക- അന്തരീക്ഷത്തിന് മുകളിലും ഭൗമോപരിതലത്തിലും. കാരണം അന്തരീക്ഷത്തിലെ വാതകങ്ങൾ ഈ റേഡിയേഷൻ സപ്ലൈയെ കാര്യമായി ബാധിയ്ക്കുന്നുണ്ട്. അന്തരീക്ഷത്തിന് മുകളിൽ എത്തുന്ന സൂര്യപ്രകാശത്തിൽ 50% ഇൻഫ്രാ റെഡ് (IR) കിരണങ്ങളും 40% ദൃശ്യപ്രകാശവും 10%  UV കിരണങ്ങളും ആണ്. പക്ഷേ ഭൗമോപരിതലത്തിലെത്തുന്ന സൂര്യപ്രകാശത്തിൽ 44% ദൃശ്യപ്രകാശവും 3% UV-യും ബാക്കി ഏതാണ്ട് മൊത്തം IR-ഉം ആണ്. ഈ 3% UV-യിൽ തന്നെ 95% UVA-യും ബാക്കി UVB-യും ആണ്. UVC ഭൗമോപരിതലത്തിൽ എത്തുന്നില്ല എന്ന് തന്നെ പറയാം. അതായത് UV-യുടെ നല്ലൊരു പങ്കും, പ്രത്യേകിച്ച് തരംഗദൈർഘ്യം കുറഞ്ഞവ, അന്തരീക്ഷത്തിൽ വെച്ച് മോഷ്ടിക്കപ്പെടുന്നു. UVC ഏതൊണ്ടൊക്കെയും അന്തരീക്ഷത്തിൽ ഓസോണിന്റെ നിർമാണം നടക്കുന്ന രാസപ്രവർത്തനത്തിനാണ് ഉപയോഗിക്കപ്പെടുന്നത്. ഈ ഓസോണാകട്ടെ UVB-യെ ആഗിരണം ചെയ്യുന്നതിലും പങ്ക് വഹിക്കുന്നു. പോരാത്തതിന് UVB-യുടെ അളവ് അന്തരീക്ഷസാഹചര്യമനുസരിച്ച് നല്ലതുപോലെ വ്യത്യാസം വരുന്നുണ്ട്. ഉദാഹരണത്തിന് മേഘങ്ങളുണ്ടെങ്കിൽ തറയിലെത്തുന്ന UVB-യുടെ അളവ് നല്ലതുപോലെ കുറയുന്നതായി കാണാം.

ചുരുക്കത്തിൽ, തറയിലെത്തുന്നതിൽ 95 ശതമാനവും UVA ആണ്. വളരെ അപകടകാരിയായ UVC എത്തുന്നില്ല എന്നുതന്നെ പറയാം. ബാക്കിയുള്ള UVB-യ്ക്ക് നല്ലതും ചീത്തയുമായ ഗുണങ്ങളുണ്ട്. തൊലിയിലെ വിറ്റാമിൻ-D യുടേയും മെലാനിൻ എന്ന വർണവസ്തുവിന്റേയും ഉല്പാദനത്തെ ഇത് സഹായിക്കുന്നുണ്ട്. പക്ഷേ അധികമായ അളവിൽ ഇത് സൂര്യാഘാതത്തിനും തൊലിയിലെ ക്യാൻസറിനുമൊക്കെ കാരണമാകാം. അധികമായാൽ UVA വരെ കുഴപ്പമുണ്ടാക്കുമെന്ന് സൂചനകളുണ്ട്. അതിനാൽ സൂര്യപ്രകാശത്തിലെ UV വികിരണങ്ങൾ അധികം ഏൽക്കാതിരിക്കുന്നതാണ് നല്ലത്.

ഇനി സൂര്യഗ്രഹണത്തിലേയ്ക്ക്...

ചന്ദ്രൻ ഭൂമിയ്ക്കും സൂര്യനും ഇടയിൽ വരുമ്പോൾ ചന്ദ്രന്റെ നിഴൽ വീഴുന്ന ഭാഗത്ത് സൂര്യപ്രകാശം മറയ്ക്കപ്പെടുന്നതാണ് സൂര്യഗ്രഹണം. സൂര്യപ്രകാശം എന്നാൽ സൂര്യനിലെ ഏതെങ്കിലും പ്രത്യേക തരംഗദൈർഘ്യമൊന്നുമല്ല, എല്ലാതരം വികിരണങ്ങളേയും അത് ഒരുപോലെ തടയും. അതായത് ഗ്രഹണം നടക്കുമ്പോൾ ഭൂമിയിലെത്തുന്ന അൾട്രാ വയലറ്റ് കിരണങ്ങൾ കൂടുകയല്ല, കുറയുകയാണ് ചെയ്യുന്നത്.

എഹ്? അപ്പോ ഗ്രഹണസമയത്ത് സൂര്യനെ നോക്കരുത് എന്ന് പറയുന്നത് വെറുതേയാണോ?

അല്ല. പക്ഷേ കാരണം വേറെയാണ്. സൂര്യപ്രകാശത്തിലെ UV കണ്ണുകൾക്ക് കേടാണ്. അത് അന്ധതയ്ക്ക് വരെ കാരണമാകും. പക്ഷേ സാധാരണഗതിയിൽ അപകടം ഉണ്ടാക്കുന്ന വിധത്തിൽ സൂര്യപ്രകാശം നമ്മുടെ കണ്ണിൽ വീഴില്ല. കാരണം സിമ്പിളാണ്, സൂര്യനിലേയ്ക്ക് നേരിട്ട് നോക്കിയാൽ പ്രകാശതീവ്രത കാരണം നമ്മൾ അറിയാതെ കണ്ണടച്ചുപോകും കണ്ണടച്ചില്ലെങ്കിൽ തീർച്ചയായും പണി കിട്ടും. ടെലിസ്കോപ്പോ ബൈനോക്കുലറോ സൂര്യന് നേരേ തിരിയ്ക്കുന്നതിനെ കുറിച്ച് ആലോചിക്കുക പോലും ചെയ്യരുത്. പക്ഷേ ഗ്രഹണസമയത്ത് അങ്ങനല്ല. പ്രകാശതീവ്രത കുറവായതിനാൽ നമ്മുടെ കണ്ണ് വേദനിക്കില്ല. നമ്മൾ നോക്കിനിൽക്കും. പക്ഷേ UV അപ്പോഴും വന്നുകൊണ്ടിരിക്കുന്നുണ്ടാകും. കണ്ണുകൾക്ക് അതിനോട് സംവേദനശേഷി ഇല്ലാത്തതിനാൽ നമ്മളത് അറിയില്ല. അങ്ങനെ UV-യെ ആളറിയാതെ വിളിച്ച് കയറ്റി നമ്മൾ സ്വന്തം കണ്ണ് കേടാക്കും. ഇത് ഗ്രഹണം 'കാണുമ്പോൾ' ഉള്ള റിസ്കാണ്. അല്ലാതെ ഗ്രഹണസമയത്ത് ഇറങ്ങിനടക്കുന്നതിനൊന്നും യാതൊരു പ്രശ്നവും ഇല്ല എന്ന് മാത്രമല്ല, വെയിലത്ത് നടക്കുന്നതിനെക്കാൾ പല മടങ്ങ് സുരക്ഷിതമാണ് എന്നതാണ് സത്യം. 

Mar 2, 2016

മാതൃസ്നേഹിയായ രാമു

കുഞ്ചുവമ്മയ്ക്ക് രണ്ട് മക്കളായിരുന്നു- രാമുവും ദാമുവും. രാമു വല്യ മാതൃസ്നേഹിയാണ്. എന്നും രാവിലേയും ഉച്ചയ്ക്കും വൈകിട്ടുമായി മൂന്ന് നേരം വീട്ടിന്റെ മുന്നിൽ ഇറങ്ങിനിന്ന് നാട്ടുകാര് കേൾക്കെ, "എന്റെ അമ്മയാണ് ലോകത്തിലെ ഏറ്റവും നല്ല അമ്മ" എന്ന് വിളിച്ച് പറയും. ഇടക്കിടെ അമ്മയുടെ കാലിൽ വീണ് അനുഗ്രഹം വാങ്ങിക്കും, അമ്മയ്ക്ക് ആരതി ഉഴിയും. ദാമുവിന് ഇത്തരം കാര്യങ്ങളിലൊന്നും താത്പര്യമില്ലായിരുന്നു.

ഒരു ദിവസം കുഞ്ചുവമ്മയ്ക്ക് ചുമ തുടങ്ങി. ദാമു ചോദിച്ചു, "എന്താ അമ്മേ ചുമയ്ക്കുന്നത്?"

ഇത് കേട്ട് രാമു എവിടുന്നോ ഓടിപ്പാഞ്ഞ് വന്നു, "പ്ഭ! നായിന്റെ മോനേ. സ്വന്തം അമ്മയെ കുറ്റം പറയുന്നോടാ? ഈ അമ്മയല്ലേടാ നിന്നെ ഇത്രേം നാളും വളർത്തിയത്?"

 ആവേശത്തിനിടെ സ്വന്തം തന്തയ്ക്ക് കൂടിയാണ് വിളിച്ചത് എന്നുപോലും രാമു മറന്നുപോയി. അല്ലെങ്കിലും രാമു അങ്ങനാണ്, അതാണ് രാമു.

മാതൃസ്നേഹിയായ രാമുവിനോട് ദാമു പറഞ്ഞു - "ചേട്ടാ, അമ്മ ചുമയ്ക്കുന്നുണ്ട്. അമ്മയ്ക്ക് വല്ല ആരോഗ്യപ്രശ്നവും ആണെങ്കിലോ?"

 രാമുവിന് കലിയടങ്ങിയില്ല, "എന്ത്! എന്റെ അമ്മയ്ക്ക് ഒരു ആരോഗ്യപ്രശ്നവും ഇല്ല. ഉണ്ടാവുകയും ഇല്ല. കാരണം എന്റെ അമ്മ ലോകത്തിലെ ഏറ്റവും നല്ല അമ്മയാണ്. പോറ്റിവളർത്തിയ അമ്മയുടെ കുറ്റം കണ്ടുപിടിക്കുന്ന നീ അപ്പുറത്തെ വീട്ടിലേയ്ക്ക് പോടാ. നിനക്ക് അവിടുത്തെ സ്ത്രീയോടാണ് കൂറ്"

ദാമു പിന്നൊന്നും പറഞ്ഞില്ല.

പിറ്റേന്നായപ്പോൾ കുഞ്ചുവമ്മയ്ക്ക് ചുമ പിന്നേയും കൂടി. എഴുന്നേറ്റ് നടക്കാൻ വയ്യാതായി.

"അമ്മേ, ഇതെന്തോ പ്രശ്നമാണ്. നമുക്ക് ആശുപത്രിയിലേക്ക് പോയാലോ?" - ദാമു ചോദിച്ചു.

കട്ടിലിനരികിൽ അമ്മയ്ക്ക് ആരതി ഉഴിഞ്ഞുകൊണ്ടിരുന്ന രാമു ചാടിയെണീറ്റ് ദാമുവിന്റെ ചെകിട്ടത്ത് ഒരടി വെച്ചുകൊടുത്തു, "ഈ വീട്ടിൽ നിന്നുകൊണ്ട് വേറൊരു വീട്ടിലെ ആളുകൾ നടത്തുന്ന ആശുപത്രിയ്ക്ക് വേണ്ടി വാദിക്കുന്ന നീയൊരു മാതൃദ്രോഹിയാണ്. സ്വന്തം അമ്മയുടെ മഹത്വം മനസിലാക്കാതെ വല്ലവർക്കും വേണ്ടി വാദിക്കുന്ന നീയൊക്കെ ആർക്ക് ഉണ്ടായതാടാ?"

പഴയതുപോലെ സ്വന്തം തള്ളയ്ക്ക് വിളിക്കുകയാണ് ചെയ്തത് എന്ന് രാമു ഓർത്തില്ല. അല്ലെങ്കിലും രാമു അങ്ങനാണ്, അതാണ് രാമു.

ദാമു കൂടുതലെന്തെങ്കിലും പറയുന്നതിന് മുന്നേ രാമു വീടിന് മുന്നിൽ ഇറങ്ങിനിന്ന് ബഹളം വെക്കാൻ തുടങ്ങി, "നാട്ടുകാരേ, നിങ്ങൾ നോക്കിയേ. ദേ ഈ മാതൃദ്രോഹി സ്വന്തം അമ്മയെ കുറ്റം പറയുന്നു. എന്റെ അമ്മ ലോകത്തിലെ ഏറ്റവും നല്ല അമ്മയാണ്"

 നാട്ടുകാര് ഈ നാട്ടുകാര് തന്നെയായിരുന്നു. അതുകൊണ്ട് അവര് കൂടുതലൊന്നും അന്വേഷിക്കാൻ മെനക്കെട്ടില്ല. "ഹും! രാമു എന്തൊരു മാതൃസ്നേഹിയാണ്! ആ ദാമുവാകട്ടെ സ്വന്തം അമ്മയുടെ കുറ്റം കണ്ടുപിടിക്കാൻ നടക്കുവാ. ഇവനൊക്കെ ഒരു മകനാണോ" എന്നവർ ആശ്ചര്യം കൊണ്ടു.

അടുത്ത ദിവസം കുഞ്ചുവമ്മയ്ക്ക് കട്ടിലിൽ നിന്ന് എഴുന്നേൽക്കാൻ കഴിയാതായി. ദാമു മുറിയിലേയ്ക്ക് ചെന്നപ്പോൾ, ആരതി ഉഴിഞ്ഞുകൊണ്ടിരുന്ന രാമു കൈയിലെ കുറുവടി എടുത്ത് കാട്ടി കണ്ണുരുട്ടി. എന്തെങ്കിലും പറഞ്ഞുപോയാൽ തടി കേടാവുമെന്ന് ദാമുവിന് മനസ്സിലായി. കാരണം രാമു അങ്ങനാണ്, അതാണ് രാമു.

 ദാമു സങ്കടത്തോടെ വാതിലിൽ നിന്ന് അമ്മയെ നോക്കി നിന്നു. കുഞ്ചുവമ്മ നെഞ്ചത്ത് കൈവച്ച് ആഞ്ഞാഞ്ഞ് ചുമച്ചുകൊണ്ട്, കിതച്ചുകൊണ്ട് അവിടെ കിടന്നു. രാമു പതിവ് പോലെ മുറ്റത്തിറങ്ങി വിളിച്ചുപറഞ്ഞു, "എന്റെ അമ്മ ലോകത്തിലെ ഏറ്റവും നല്ല അമ്മയാണ്"

അത് കേട്ട് നാട്ടുകാരും പറഞ്ഞു, "രാമു ഒരു മാതൃസ്നേഹി തന്നെ!"